Ҷудочиёни тоҷик барои иштирок дар чемпионати Осиё ба Тайиланд сафар намуданд

ДУШАНБЕ, 23.04.2025. /АМИТ «Ховар»/. 13 ҷудочии тоҷик барои иштирок дар Чемпионати Осиё оид ба ҷудо ба шаҳри Бангкоки Тайиланд сафар намуданд. Дар ин хусус ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Мусобиқа аз 25 то 27 апрел дар шаҳри Бангкоки Тайиланд баргузор гардида, дар он аз Тоҷикистон Муҳаммадсолеҳ Қувватов дар вазни (60 кг), Обид Ҷебов, Эмомалии Нуралӣ (66 кг), Абубакр Шеров (73 кг), Сомон Маҳмадбеков (81 кг) , Умедҷон Раҷабов (90 кг), Ҷаҳонгир Маҷидов, Кароматулло Ҳакимов (100 кг), Темур Раҳимов (+100 кг) байни мардон ва Аҳлия Муминова (48 кг), Мадина Қурбонзода (52 кг), Александра Кан (57 кг) ва Виктория Киселёва (78 кг) дар байни духтарон иштирок менамоянд.

Имсол дастаи мунтахаби Тоҷикистон бори аввал дар таърих дар Чемпионати Осиё дар байни дастаҳо иштирок менамояд. Ин рӯйдоди муҳими варзишӣ барои давлати мо қадами бузург дар рушди ҷудо ва нишон додани қудрати паҳлавонони тоҷик дар арсаи байналмилалӣ мебошад. Ҳамчунин гуфта мешавад, ки бар асоси натиҷаҳои Чемпионати Осиё ва мусобиқаи Dushanbe Grand Slam 2025 ҳайати асосии дастаи мунтахаби ҷудои мамлакат барои иштирок дар Чемпионати ҷудои ҷаҳон дар шаҳри Будапешти Маҷористон муайян карда мешавад.

АКС:  Кумитаи кор бо ҷавонон ва варзиши назди Ҳукумати Ҷумҳурии Тоҷикистон