Вобаста ба ҳамкории илмӣ дар фазои АвруОсиё форуми байналмилалӣ доир шуд

Апрель 11, 2025 10:51

ДУШАНБЕ, 11.04.2025. /АМИТ «Ховар»/. 10 апрел дар Донишгоҳи технологии Тоҷикистон дар доираи Солҳои рушди иқтисоди рақамӣ ва инноватсия (2025-2030) таҳти унвони «Ҳамкории илмӣ дар фазои АвруОсиё: рақамикунонӣ ва модернизатсияи саноат бо истифода аз зеҳни сунъӣ» форуми байналмилалӣ баргузор гардид. Дар ин хусус ба АМИТ «Ховар» аз ин донишгоҳ иттилоъ доданд.

Дар форум меҳмонони хориҷию дохилӣ ва мутахассисони соҳаи рақамикунонӣ ва зеҳни сунъӣ иштирок намуда, маърузаҳои маҷозӣ низ шунида шуданд.

Қабл аз оғози форум меҳмонон бо дастовардҳои илмӣ, истеҳсолӣ ва эҷодии устодону донишҷӯёни Донишгоҳи технологии Тоҷикистон шинос шуданд.

Ректори Донишгоҳи технологии Тоҷикистон Зоир Раҳмонзода изҳор намуд, ки ин форум барои дар амал татбиқ намудани нишондиҳандаҳои Паёми Президенти Ҷумҳурии Тоҷикистон ба Маҷлиси Олӣ, ки 28 декабри соли 2024 пешниҳод шуда, дар он солҳои 2025-2030 Солҳои рушди иқтисоди рақамӣ ва инноватсия эълон гардиданд, равона шудааст.

Ҷаҳони кунуниро бе рушди технологияҳои иттилоотию коммуникатсионӣ ва рақамикунонӣ тасаввур кардан ғайриимкон аст. Аз ин рӯ, бояд донишгоҳу донишкадаҳо, марказҳои илмӣ барои табодули донишу таҷриба ва дастовардҳои илмию инноватсионӣ робитаҳои илмӣ намоянд, то тавонанд ба ҳадафҳои гузоштаашон ба осонӣ даст ёбанд. Маҳз ташкили форум барои мубодилаи донишу таҷриба ва баҳсҳои илмӣ дар фазои АвруОсиё кумак менамояд.

Иброз гардид, ки дар ҳамоиш олимон, муҳаққиқон, омӯзгорон ва коршиносон аз Италия, Русия, Беларус, Қазоқистон, Қирғизистон, Узбекистон ва Латвия иштирок намуданд. Фазои фарогирии маърузаҳои илмии аз ҷониби иштирокчиён пешниҳодшуда беш аз 30 вилояту шаҳр, аз ҷумла: Душанбе, Хуҷанд, Исфара, Кӯлоб, Тошканд, Бухоро, Намангон, Фарғона, Қазон, Иваново, Пятигорск, Москва, Падова (Италия), Брест, Могилев, Гомел, Алмато, Остона, Бишкек, Ӯш ва дигар марказҳои илмиро дар бар мегирад.

Форум барои донишгоҳҳои иштирокдори минтақаи АвруОсиё дорои аҳамияти бузурги илмӣ ва стратегӣ мебошад. Воситаи муҳими рушди иқтисодиёти рақамӣ, саноат ва технологияҳои инноватсионӣ дар таълимгоҳҳои мухталиф истифодаи зеҳни сунъӣ дар баробари муаммоҳо ва имконияти рушди илмӣ-техникӣ мебошад. Баргузории он на танҳо платформаи мубодилаи дониш ва таҷриба аст, балки василаи муҳиме барои тақвияти равобити байналмилалӣ ва рушди устувор ба ҳисоб меравад.

Меҳмонон ин форумро хеле муҳим арзёбӣ намуда, онро фазои мусоид барои ҳалли масоили илмию таълимӣ, табодули таҷриба ва густариши самти рақамикунонӣ, модернизатсия ва зеҳни сунъӣ номиданд.