Вобаста ба Даҳаи муаррифии илми академии тоҷик конференсияи илмию назариявӣ баргузор шуд

ДУШАНБЕ, 03.04.2025 /АМИТ «Ховар»/. 2 апрел дар Академияи миллии илмҳои Тоҷикистон дар доираи Даҳаи муаррифии илми академии тоҷик конференсияи илмию назариявӣ баргузор шуд, хабар доданд ба АМИТ «Ховар» аз академия.
Конференсия ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» (2020-2040), «Даҳсолаи байналмилалии «Об барои рушди устувор», (2018-2028), Солҳои рушди иқтисоди рақамӣ ва инноватсия (2025-2030), Соли байналмилалии ҳифзи пиряхҳо (2025) ва 700-солагии бузургтарин шоири ғазалсарои тоҷику форс Ҳофизи Шерозӣ бахшида шуд.
Президенти Академияи миллии илмҳо Қобилҷон Хушвахтзода иброз дошт, ки Даҳаи муаррифии илми академии тоҷик фурсати хубе барои табодули андешаю дастовардҳои илмии ҳайати олимони академия ва таҳрикбахш дар ростои машғул шудан ба пажуҳишҳои илмӣ мебошад. Ба хотири боз ҳам беҳтар гузаронидани омӯзиши илмҳои табиатшиносӣ, дақиқ ва риёзӣ, инчунин барои тавсеаи тафаккури техникии насли наврас солҳои 2020-2040 аз ҷониби Президенти Тоҷикистон муҳтарам Эмомалӣ Раҳмон «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» эълон шуданд. Ин иқдом ба рушди тафаккури техникӣ ва тавсеаи ҷаҳонбинии илмии ҷомеа такони ҷиддӣ мебахшад.
Имрӯз маводи олимону муҳаққиқони муассисаҳои илмӣ- таҳқиқотии Академияи миллии илмҳои Тоҷикистон дар сомонаи РИНС ворид карда шудаанд. Дар маҷмуъ Академияи миллии илмҳои Тоҷикистон дар байни муассисаҳои таҳсилоти олӣ дар мақоми аввал қарор гирифт.
Иқдоми наҷиб — Солҳои рушди иқтисоди рақамӣ ва инноватсия эълон гардидани солҳои 2025-2030 ба дурнамои неки рушди иқтисоди миллӣ мусоидат менамояд.
Дар идомаи конференсия вобаста ба мавзуъҳои тахассусӣ маърузаҳо пешниҳод гардиданд.
АКС: Академияи миллии илмҳои Тоҷикистон