Вохӯрии дуюми котибони шуроҳои амнияти давлатҳои Осиёи Марказӣ дар Самарқанд баргузор шуд
ДУШАНБЕ, 18.04.2025. /АМИТ «Ховар»/. 18 апрели соли 2025 дар шаҳри Самарқанд дар доираи раёсати Ҷумҳурии Узбекистон дар Вохӯрии машваратии сарони давлатҳои Осиёи Марказӣ вохӯрии дуюми котибони шуроҳои амнияти давлатҳои Осиёи Марказӣ баргузор шуд.
Чорабинӣ таҳти раёсати Котиби Шурои амнияти назди Президенти Ҷумҳурии Узбекистон Виктор Маҳмудов ва бо иштироки Котиби Шурои амнияти Ҷумҳурии Тоҷикистон Юсуф Раҳмон, Котиби Шурои амнияти Ҷумҳурии Қазоқистон Гизат Нурдаулетов, Котиби Шурои амнияти Ҷумҳурии Қирғизистон Марат Иманқулов ва атташеи ҳарбии Сафорати Туркманистон дар Узбекистон Мейлиса Аннабердиева доир гардид.
Нахуст дар вохӯрӣ паёми табрикии Президенти Ҷумҳурии Узбекистон Шавкат Мирзиёев қироат карда шуд.
Дар оғоз котибони шуроҳои амнияти давлатҳои Осиёи Марказӣ аз натиҷаҳои мулоқоти сеҷонибаи Президенти Ҷумҳурии Тоҷикистон муҳтарам Эмомалӣ Раҳмон, Президенти Ҷумҳурии Қирғизистон муҳтарам Садир Жапаров ва Президенти Ҷумҳурии Узбекистон муҳтарам Шавкат Мирзиёев, ки 31 марти соли 2025 дар шаҳри Хуҷанд баргузор гардид ва дар доираи он санадҳои муҳими таърихӣ – Шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон дар бораи нуқтаи пайвастшавии сарҳадҳои давлатии се кишвар ва Эъломияи Хуҷанд оид ба дӯстии абадӣ ба имзо расиданд, бо қаноатмандӣ истиқбол намуданд.
Дар вохӯрӣ маҷмуи васеи масъалаҳои амнияти минтақавӣ, мубориза бо терроризм, ифротгароӣ, радикализм ва ҷиноятҳои муташаккили фаромиллӣ, ҳамкорӣ дар соҳаи амнияти экологӣ дар минтақа, инчунин талошҳои муштарак барои таъмини амнияти нақлиётӣ дар Осиёи Марказӣ ва инкишофи иқтидори нақлиётию транзитии он баррасӣ шуданд.
Дар анҷоми нишаст Протоколи Вохӯрии дуюми котибони шуроҳои амнияти давлатҳои Осиёи Марказӣ қабул гардид, ки татбиқи тадбирҳои мушаххас оид ба рушди минбаъдаи ҳамкорӣ дар самтҳои афзалиятноки зимни ин чорабинӣ баррасишударо пешбинӣ менамояд.
Қарор дода шуд, ки Вохӯрии сеюми котибони Шуроҳои амнияти давлатҳои Осиёи Марказӣ соли 2026 дар шаҳри Душанбе баргузор мегардад.
Раёсати ВКД дар вилояти Хатлон: «Таътили тобистона бояд ба давраи тарбия, донишандӯзӣ ва истироҳати солим табдил ёбад»
Юсуф Раҳмон дар Форуми байналмилалии амният ва Вохӯрии байналмилалии намояндагони воломақом иштирок намуд
РӮЗИ ҚӮШУНҲОИ САРҲАДӢ. Афсарону сарбозони ин ниҳод рисолати фарзандии худро дар назди Ватан – Модар ва халқу давлат бо сарбаландӣ адо менамоянд
Котиби Шурои амнияти Тоҷикистон дар Вохӯрии котибони шуроҳои амният дар қолаби «Осиёи Марказӣ – Русия» иштирок намуд
Юсуф Раҳмон дар ҷаласаи Кумитаи котибони шуроҳои амнияти Созмони Аҳдномаи амнияти дастҷамъӣ иштирок намуд
Дар Тоҷикистон нақшаи даъвати баҳорӣ ба сафи Қувваҳои Мусаллаҳ 100 фоиз иҷро шуд
Оид ба Стратегияи пешгирии экстремизм ва терроризм дар Тоҷикистон вохӯрӣ баргузор гардид
Дар Душанбе масоили муқовимат ба ҷинояткорӣ дар замони муосир баррасӣ шуд
Намояндаи Тоҷикистон татбиқи Стратегияи миллӣ оид ба назорати маводи нашъаоварро дар ҷаласаи СҲШ муаррифӣ намуд
Ҳабибулло Воҳидзода бо аъзои иттиҳодияи ҷамъиятии «Пайравони Пешвои миллат» вохӯрӣ намуд
Дабири кулли САҲА Фаридун Синирлиоғлу саҳми Президенти Тоҷикистон Эмомалӣ Раҳмонро дар таҳкими суботи минтақавӣ баланд арзёбӣ намуд
Ҷаласаи навбатии Шурои ҳамоҳангсозии мақомоти ҳифзи ҳуқуқи пойтахт баргузор шуд
