Беш аз 100 нафар ҷавонон аз Тоҷикистон ва дигар давлатҳо масъалаи ҳифзи пиряхҳоро баррасӣ менамоянд

ДУШАНБЕ, 28.05.2025. /АМИТ «Ховар»/. Пагоҳ, 29 май бо иштироки беш аз 100 нафар ҷавонон аз Тоҷикистон ва хориҷи мамлакат Форуми кӯдакон ва ҷавонон бахшида ба ҳифзи пиряхҳо (Тавонмандсозии насли оянда: садоҳо барои ҳифзи пиряхҳо ва иқдоми иқлимӣ) баргузор мегардад, иттилоъ медиҳад АМИТ «Ховар».

Ҷавонон дар доираи Конфронси байналмилалии сатҳи баланд оид ба ҳифзи пиряхҳо дар таҳияи роҳҳои амалишавандаи ҳифзи пиряхҳо ва амалиёти иқлим иштирок менамоянд.

Аз шумораи умумии ҷавонони иштироккунанда дар Форуми кӯдакон ва ҷавонон бахшида ба ҳифзи пиряхҳо 10 нафар намояндаи мамлакатҳое мебошанд, ки дар он ҷо пиряхҳо аз тағйирёбии иқлим осебпазир ҳастанд.

Форуми наврасон ва ҷавонон оид ба ҳифзи пиряхҳо ва амалиёти иқлим машғулияти омӯзишӣ ва суҳбатҳои интерактивиро дар бар гирифта, дар онҳо ҷавонон бо сиёсатмадорон ба таври мустақим табодули андеша менамоянд.

Аввалин маротиба дар форум асарҳо бо технологияҳои рақамӣ ва истифодаи зеҳни сунъӣ пешниҳод шуда, порчаҳои тахайюлии наврасону ҷавонон оид ба чӣ гуна қабул намудани буҳрони иқлим пешниҳод мегарданд.

Иштирокчиёни Конфронси байналмилалии сатҳи баланд оид ба ҳифзи пиряхҳо метавонанд тавассути ин галереяи электронӣ саҳми кӯдаконро дар ҳифзи пиряхҳо бинанд ва садои онҳоро шунаванд. Ин иқдом  муҳим будани ҳифзи пиряхҳоро барои кӯдакон таъкид менамояд.

Зарангези ЛАТИФ,
АМИТ «Ховар»

АКС: Котиботи Конфронси байналмилалии сатҳи баланд оид ба ҳифзи пиряхҳо