Дар Душанбе бахшида ба 1155-солагии олими бузурги тоҷик Абумансури Мотурдӣ ҳамоиши илмӣ баргузор мешавад

ДУШАНБЕ, 02.05.2025 /АМИТ «Ховар»/. 27 майи соли равон бахшида ба 1155-солагии олими бузурги тоҷик, бунёдгузори мактаби каломи Мовароуннаҳр Абумансури Мотурдӣ ҳамоиши илмӣ баргузор мешавад. Ҳамоиши илмӣ дар асоси «Ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаю ҳунарҳои мардумӣ дар Ҷумҳурии Тоҷикистон барои соли 2025», ки бо Амри Президенти Ҷумҳурии Тоҷикистон аз 2 январи соли 2025 тасдиқ шудааст, баргузор мегардад. Дар ин хусус АМИТ «Ховар» бо истинод ба Муассисаи давлатии «Маркази исломшиносӣ дар назди Президенти Ҷумҳурии Тоҷикистон» иттилоъ медиҳад.

Дар ҳамоиши илмӣ иштироки намояндагони вазорату идораҳо, олимону донишмандон ва ходимони дини мамлакат, инчунин олимону мутахассисон ва коршиносон аз хориҷи ҷумҳурӣ ба тариқи маҷозӣ дар назар дошта шудааст.

Ҳамоиши илмӣ аз ҷониби Муассисаи давлатии «Маркази исломшиносӣ дар назди Президенти Ҷумҳурии Тоҷикистон» дар ҳамкорӣ бо , вазоратҳои маориф ва илм, корҳои хориҷӣ, кумитаҳои дин ва танзими ҷашну маросим, телевизион ва радио, Академияи миллии илмҳо, Донишкадаи исломӣ, мақомоти иҷроияи ҳокимияти давлатии вилоятҳо ва шаҳру ноҳияҳо баргузор карда мешавад.

Шайх Абўмансури Мотуридӣ яке аз чеҳраҳои шинохтаи мазҳаби ҳанафӣ дар ҳавзаи Мовароуннаҳр ва берун аз он маҳсуб шуда, дар Мотурид, ки яке аз деҳаҳои Самарқанд аст, таваллуд шудааст. Дар маъхазҳои таърихӣ дар бораи соли таваллуди Мотурдӣ маълумоти тахминӣ оварда шудааст. Масалан, маълум аст, ки ў дар замони халифаи Аббосӣ Мутаваккил (232-247ҳ.) зиндагӣ кардааст. Инчунин, бо назардошти он ки аз устодоне чун Муҳаммад ибни Муқотили Розӣ (ваф. 248 ҳиҷрӣ) ва Носир ибни Яҳёи Балхӣ (ваф. 268 ҳ.) таълим гирифтааст, метавон гуфт, ки соли таваллуди Шайх дар ҳудуди солҳои 238 ё 248-уми ҳиҷрӣ будааст. Номи пурраи ӯ Муҳаммад ибни Муҳаммад ибни Маҳмуди Мотуридии Самарқандӣ аст.

Абўмансури Мотуридӣ аз устодон ва донишмандони зиёде, ки худи онҳо шогирдони Имоми Аъзам Абўҳанифа будаанд, дарс омўхтааст. Муътамадтарин маълумот дар бораи санаи вафоти ў соли 333-уми ҳиҷрӣ мебошад, ки ба соли 944-уми милодӣ рост меояд.

Абумансури Мотуридӣ дар тўли ҳаёти пурбаракати худ мазҳаби ҳанафиро ривоҷу равнақ дода, дар баробари ин шогирдони бисёреро ба воя расондааст. Асарҳои ӯ дар китобхонаҳои Миср, Макка, Димишқ, Ҳиндустон, Туркия ва Тошканд маҳфуз мебошад.

АКС: АМИТ «Ховар»