ДАРАХТ БИНШОН! Дар ноҳияи Рашт беш аз 23 ҳазор бех ниҳоли ороишию ҳамешасабз шинонида шуд

РАШТ, 04.05.2025 /АМИТ «Ховар»/.  Дар асоси Барномаи рушди соҳаи ҷангал ва дастгирии шарикони рушд то имрӯз дар кӯҳҳои болои шаҳраки Ғарм, шаҳраки Навобод ва деҳаи Варзигули ноҳияи Рашт бо шинонидани ниҳолҳои қарағоч, ақоқиё, чормағз ва дарахтони мевадиҳанда  дар зиёда аз 40  гектар ҷангал бунёд намудем. 45 гектар ҷангалзорро барқарор намудем, ки ҳоло сабзишу нашъунамои онҳо хуб мебошад. Дар ин хусус ба хабарнигори  минтақавии АМИТ «Ховар» Субҳониддини Маҳмуд директори Муассисаи давлатии хоҷагии ҷангали ноҳияи Рашт Қурбоналӣ Муродов  иттилоъ дод.

Дар ниҳолхонаи Хоҷагии ҷангали ноҳияи Рашт зиёда аз 20 ҳазор ниҳол мавҷуд аст, ки онҳоро зимни  бунёд ва барқарорсозии  ҷангалзор истифода мебаранд. Ҳамчунин дар ин ниҳолхона 300 кг тухми чормағзи навъи «аъло»  ва 10 кг  донаи зардолуи навъҳои маҳаллиро таги қум намуда, сабзониданд ва дар минтақаҳои  «Шингилич», «Камароб»  ва «Навобод»-и  ноҳия  шинониданд. Дар оянда тавассути онҳо боғҳои чормағзу зардолуи   аълосифат ташкил мегардад.

Тибқи иттилои сардори шуъбаи ҳифзи муҳити зисти ноҳияи Рашт,  соли 2025  дар ҳудуди ҷамоатҳои шаҳраку деҳоти ноҳия мувофиқи нақшаи тасдиқгардида бояд  18 ҳазор бех ниҳолҳои гуногун шинонида шаванд.

Бо дастгирии Мақомоти иҷроияи ҳокимияти давлатии ноҳияи Рашт ва Кумитаи ҳифзи муҳити зисти ҷумҳурӣ сокинони ноҳияи Рашт  то имрӯз ба миқдори  23 ҳазору 568  бех ниҳолҳои ороишӣ, ҳамешасабз ва мевадиҳандаю сояафкан шинониданд.

Имрӯзҳо дар маркази ноҳияи Рашт ва марказҳои ҷамоатҳои шаҳраку деҳоти ноҳия шинонидани гулҳои гуногунранг оғоз гардидааст, ки дар оянда маркази ноҳияи Раштро гулзор менамоянд.

АКС: Мақомоти иҷроияи ҳокимияти давлатии ноҳияи Рашт