Оид ба тайёр намудани мутахассисони касбӣ ва омӯзиши фанҳои дақиқ машварати илмӣ баргузор гардид

ДУШАНБЕ, 10.05.2025 /АМИТ «Ховар»/. Масъалаҳои тайёр намудани мутахассисони касбӣ, омӯзиши фанҳои дақиқ ва тағйирёбии иқлим зимни машварати илмӣ-амалӣ дар Маркази минтақавии бехатарӣ, амният ва кафолати химиявӣ, биологӣ, радиатсионӣ ва ядроии Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон мавриди таҳлилу баррасӣ қарор гирифтанд.

Тавре АМИТ «Ховар» хабар медиҳад, машварат дар доираи эълон гардидани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф (2020-2040)» ва дар амал татбиқ намудани «Барномаи давлатии тайёр намудани кадрҳои сатҳи баланди илмӣ барои солҳои 2021-2030»  баргузор шуд.

Дар машварат дар мавзуи «Тағйироти глобалии иқлим- обшавии пиряхҳои Тоҷикистон ва саҳми илм барои ҳалли ин мушкилот» маъруза пешниҳод гардид.

Коҳишёбии босуръати пиряхҳо дар тамоми қитъаҳои сайёра ба таври ғайримуқаррарӣ идома дорад. Давоми даҳсолаҳои охир пиряхҳои Осиёи Марказӣ, аз ҷумла пиряхҳои Тоҷикистон низ дар ҳолати ғайримуқаррарӣ қарор дошта, сол то сол таназзул меёбанд.

Агентии амнияти химиявӣ, биологӣ, радиатсионӣ ва ядроӣ ҳамчун ниҳоди танзимгар ва ҳамоҳангози миллӣ бо Агентии байналмилалии неруи атомӣ дар Тоҷикистон дар пешбурди ташаббусҳои марбут ба обу иқлим ва ҳифзи пиряхҳо саҳми арзанда мегузорад.

Таъкид гардид, ки агентӣ масъулияти татбиқи лоиҳаҳои муштарак бо Агентии байналмилалии неруи атомиро бар уҳда дорад, ки ба омӯзиш, мониторинг ва ҳифзи пиряхҳо дар шароити тағйирёбии иқлим равона гардидаанд.

АКС: Академияи миллии илмҳои Тоҷикистон