«Саноатсодиротбонк» бо Бонки содиротию воридотии Арабистони Саудӣ Ёддошти тафоҳум ба имзо расонид

ДУШАНБЕ, 21.05.2025. /АМИТ «Ховар»/. Байни Бонки саноатию содиротии Тоҷикистон «Саноатсодиротбонк» ва Бонки содиротию воридотии Арабистони Саудӣ (Saudi Exim) Ёддошти тафоҳум оид ба ҳамкорӣ ба имзо расид.

Тавре аз Корхонаи воҳиди давлатии Бонки саноатию содиротии Тоҷикистон «Саноатсодиротбонк»  ба АМИТ «Ховар» иттилоъ доданд, имрӯз дар ҳошияи ҷаласаи солонаи Гурӯҳи Бонки исломии рушд вохӯрии Раиси Раёсати  Бонки саноатию содиротии Тоҷикистон «Саноатсодиротбонк» Ҳокимшоҳ Бобозода бо муовини раиси Бонки содиротию воридотии Арабистони Саудӣ (Saudi Exim) Наиф аш-Шаммарӣ баргузор шуд.

Дар вохӯрӣ ҷонибҳо доир ба маблағгузории содиротӣ, татбиқи муштараки лоиҳаҳои сармоягузорӣ, ҳамзамон мубодилаи иттилоот оид ба амалияҳои беҳтарини фаъолияти бонкӣ ва табодули таҷриба байни кормандони ду ниҳод  мубодилаи афкор намуданд.

Баимзорасонии ин санад  фаъолияти иқтисодии хориҷии бонкро боз ҳам густариш дода, дар пешниҳоди маҳсулоти нав ва хизматрасонии босифат ба мизоҷон саҳми арзанда мегузорад.

АКС: Корхонаи воҳиди давлатии Бонки саноатию содиротии Тоҷикистон «Саноатсодиротбонк»