Тоҷикистон ҳамчун мизбони марҳилаи интихобии Ҷоми Осиё-2026 барои тимҳои олимпӣ (U-23) тасдиқ гардид

ДУШАНБЕ, 01.05.2025 /АМИТ «Ховар»/. 30 апрел Конфедератсияи футболи Осиё (КФО) мизбонони бозиҳои интихобии Ҷоми Осиё-2026 байни ҷавонони то 23-соларо эълон намуд, хабар медиҳад АМИТ «Ховар» бо истинод ба Федератсияи футболи Тоҷикистон.

Бозиҳои даври интихобии Ҷоми Осиё-2026 (U-23) дар ёздаҳ кишвар: Тоҷикистон, Камбоҷа, Чин, Индонезия, Урдун, Қирғизистон, Мянмар, Қатар, Тайиланд, Амороти Муттаҳидаи Араб ва Ветнам баргузор мешаванд.

Дар марҳилаи интихобии Ҷоми Осиё-2026 (U-23) 44 даста иштирок мекунад. Аз рӯйи натиҷаи қуръакашӣ ёздаҳ гурӯҳ ташкил карда мешавад. Ғолибони гурӯҳҳо ва чаҳор дастаи беҳтарини ҷойи дуюм ба қисми ниҳоии Ҷоми Осиё-2026, ки дар Арабистони Саудӣ баргузор мешавад, роҳхат мегиранд.

Мусобиқаи интихобии Ҷоми Осиё-2026 байни ҷавонони то 23-сола аз 1 то 9 сентябри соли равон баргузор мешавад. Рақибони дастаи мунтахаби олимпии Тоҷикистон дар гурӯҳ 29 май муайян карда мешаванд.

АКС: Федератсияи футболи Тоҷикистон