Дар 130 муассисаи таълимии ноҳияи Рӯдакӣ беш аз 10 ҳазор наврасон ба истироҳат фаро гирифта шудаанд

ДУШАНБЕ, 21.06.2025 /АМИТ «Ховар»/. Дар назди 130 муассисаи таълимии ноҳияи Рӯдакӣ 10 ҳазору  515 нафар кӯдакону наврасон ба истироҳату фароғат фаро гирифта шудаанд. Дар ин хусус ба АМИТ «Ховар» аз Раёсати маорифи ноҳияи Рӯдакӣ хабар доданд.

Инчунин дар муассисаҳои таълимии №5, 8, 10, 14, 15, 35, 36, 54, 68, 84 ва Гимназия — парваришгоҳи ба номи Бобоҷон Ғафуров истироҳатгоҳҳо бо таъминоти ғизоӣ фаъолият доранд. Дар ин истироҳатгоҳҳо 2320 нафар кӯдак, аз ҷумла 1351 духтар истироҳат намуда истодаанд.

Раёсати маорифи ноҳияи Рӯдакӣ барои фароҳам овардани шароити мусоид ва баргузории  истироҳати босамари тобистонаи хонандагон тадбирҳои зарурӣ андешида, онҳоро пайваста амалӣ  менамоянд.

Ёдовар мешавем, ки бо мақсади фароҳам овардани шароити муносиб барои истироҳати босамари кӯдакону наврасон дар мавсими тобистон ҳамасола Қарори Ҳукумати Ҷумҳурии Тоҷикистон ба тасвиб мерасад, ки тибқи он масъулин барои ташкили истироҳатгоҳҳои наздимактабӣ ва берун аз шаҳри вазифадор мегарданд.

АКС: Раёсати маорифи ноҳияи Рӯдакӣ