Дар Маҷлиси намояндагон бахшида ба Рӯзи Ваҳдати миллӣ ҳамоиши идона доир гардид

ДУШАНБЕ, 26.06.2025 /АМИТ «Ховар»/. Имрӯз дар Маҷлиси намояндагони Маҷлиси Олии Ҷумҳурии Тоҷикистон ҳамоиши идона ба муносибати 28-умин солгарди Рӯзи Ваҳдати миллӣ  баргузор шуд. Дар ин хусус ба АМИТ «Ховар» аз Маҷлиси намояндагон хабар доданд.

Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода иброз намуд, ки  «Ҷашни Ваҳдати миллӣ воқеан дастоварди беназири миллати тоҷик аст, ки маҳз ба шарофати талошҳои пайгиронаву созандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба халқи Тоҷикистон муяссар гардидааст.

“Дар он даврони мудҳиши ҷанги таҳмилӣ маҳз Ҷаноби Олӣ муҳтарам Эмомалӣ Раҳмон ҳамчун фарзанди фарзонаи миллат тавонистанд ба ҳайси Пешвои воқеӣ бо роҳнамоӣ ва ташаббусҳои дар заминаи сиёсати хирадмандона ва дурбинона роҳандозишуда миллати тоҷикро сарҷамъ созанд ва онро аз вартаи нестӣ раҳо созанд», — афзуд Раиси Маҷлиси намояндагон.

Муовини Раиси Маҷлиси намояндагон Мавсума Муинӣ  иброз дошт, ки падидаи ваҳдати миллӣ на танҳо яке аз бузургтарин дастовардҳои даврони истиқлолияти давлатии Тоҷикистон, балки таҷассумгари иродаи устувори миллати тоҷик дар роҳи таъмини субот, сулҳ ва якпорчагии мамлакат маҳсуб мешавад.

«Таърихи муосири Тоҷикистон нишон медиҳад, ки расидан ба ваҳдати миллӣ роҳи осон набуд, балки натиҷаи муборизаи сарбаландона, заҳматҳои пайваста ва тадбирҳои дурандешонаи Роҳбари хирадманд Президенти Ҷумҳурии Тоҷикистон муҳтарам Эмомалӣ Раҳмон буданд», — баён дошт Мавсума Муинӣ.

Иброз гардид, ки ваҳдати миллӣ барои Тоҷикистон баъди ҷанги шаҳрвандӣ на танҳо рукни асосии эҳёи давлат ва пойдории ҷомеа, балки як арзиши волои маънавӣ ва сиёсӣ гардид, ки тавассути он фарҳанги таҳаммулпазирӣ, ҳамдигарфаҳмӣ, меҳанпарастӣ ва истиқлолгароии ҷомеа таҳким ёфт. Имрӯз бо сари баланд гуфта метавонем, ки таҷрибаи сулҳофарини тоҷикон дар бобати ҳалли мусолиматомези низоъ, ҳам аз лиҳози назариявӣ ва ҳам аз нигоҳи амалӣ ба сарвати илми сиёсатшиносии ҷаҳонӣ мубаддал гардидааст, ки он ба заҳмату фаъолияти содиқонаву фарзандонаи Пешвои хирадсолор муҳтарам Эмомалӣ Раҳмон пайвасти ногусастанӣ дорад.

Дар охир таъкид гардид, ки ваҳдату якдигарфаҳмӣ, сулҳу субот, риояи қонуният, тартиботи ҷамъиятӣ ва ҳуқуқӣ таъмин аст, ҳеҷ гоҳ ҳуқуқ ва озодии инсон поймол нахоҳад гардид. Сулҳу оромӣ, ваҳдату ҳамбастагӣ арзишмандтарин неъмати ҳаёти инсон аст ва ҳифз кардану пойдор нигоҳ доштани онҳо вазифа ва қарзи муқаддаси ҳар як шаҳрванд мебошад.

АКС: Маҷлиси намояндагони Маҷлиси Олии Ҷумҳурии Тоҷикистон