Дар Маҷлиси намояндагон вобаста ба равандҳои татбиқи энергияи «сабз» ҳамоиш доир шуд

ДУШАНБЕ, 11.06.2025. /АМИТ «Ховар»/. 10 июн таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон  Азиз Гиёзода  ҳамоиш дар мавзӯи «Равандҳои татбиқи энергияи «сабз» дар роҳи расидан ба ҳадафҳои рушди устувор» (дар самтҳои энергетика, сохтмон ва нақлиёт) баргузор гардид. Дар ин хусус ба АМИТ «Ховар» дар Маҷлиси намояндагон хабар доданд.

Чорабинии мазкур дар асоси нақшаи кории Кумитаи Маҷлиси намояндагон оид ба энергетика, саноат, сохтмон ва коммуникатсия дар доираи амалишавии Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037 доир гардид.

Дар ҳамоиш  масъалаҳои  раванди татбиқи энергияи «сабз» дар самтҳои энергетика, сохтмон ва нақлиёт, ҳолат ва дурнамои истифодаи самараноку оқилонаи захираҳои мавҷуда, баррасии унсурҳои ҳамкории вазорату идораҳо барои эҷоди заминаи устувор ҷиҳати татбиқи раванди энергияи «сабз» дар бахшҳои иқтисоди миллӣ мавриди муҳокима қарор гирифтанд.

Иброз гардид, ки дар ҳудуди Тоҷикистон беш аз 60 фоизи захираҳои оби Осиёи Марказӣ ташаккул ёфта, неруи барқ дар мамлакат асосан аз манбаъҳои барқароршавандаи энергия истеҳсол карда мешавад. Бо мақсади ноил шудан ба ҳадафҳои рушди устувор, аз ҷумла муқовимат бо тағйирёбии иқлим ва таъмини дастрасии умум ба манбаҳои неруи арзон ва боэътимод «Барномаи рушди нақлиёти барқӣ дар Ҷумҳурии Тоҷикистон барои солҳои 2023 — 2028»  амалӣ гардида истодааст. Вобаста ба ин, сохтмони бино ва иншооти аз лиҳози энергия самаранок ва дар умум бунёди шаҳрҳои «сабз» муҳим арзёбӣ гардид.

АКС: Маҷлиси намояндагони Маҷлиси Олии Ҷумҳурии Тоҷикистон