Дар Душанбе марҳилаи дуюми Лоиҳаи «Тавонмандсозии марказҳои матбуотӣ ва ҳамкории онҳо бо ВАО» оғоз ёфт

ДУШАНБЕ, 15.07.2024 /АМИТ «Ховар»/. Имрӯз дар шаҳри Душанбе бо иштироки намояндагони марказҳои матбуотӣ, рӯзноманигорон ва роҳбарони созмонҳои журналистӣ марҳилаи дуюми Лоиҳаи «Тавонмандсозии марказҳои матбуотӣ ва ҳамкории онҳо бо воситаҳои ахбори омма» оғоз гардид. Дар ин хусус хабарнигори АМИТ «Ховар» иттилоъ медиҳад.

Лоиҳаи «Тавонмандсозии марказҳои матбуотӣ ва ҳамкории онҳо бо воситаҳои ахбори омма» бо назардошти муҳиммияти самаранокии кори марказҳои матбуотӣ дар муаррифии фаъолияти дастовардҳои ниҳодҳои давлатӣ, густариши равобити мутақобили судманди онҳо бо рӯзноманигорон таҳия шудааст.

Иброз гардид, ки ҳадафи лоиҳа ташаккули фазои мусоиди ҳамкорӣ байни котибони матбуотӣ ва расонаҳо барои инъикоси шоистаи кори ниҳодҳои давлатӣ ба ҷомеа ва ба ин восита таъмини дастрасӣ ба иттилои сареъ ва боэътимод мебошад.

Сардори раёсати таҳқиқоти стратегии Вазорати корҳои хориҷии Ҷумҳурии Тоҷикистон Мирзошариф Ҷалолов иброз дошт, ки ин чорабинӣ на танҳо оғози марҳилаи ҳамкорӣ байни марказҳои матбуотӣ ва воситаҳои ахбори омма, балки замина барои ба роҳ мондани имконоти нав дар самти такмили ихтисос ва мубодилаи таҷрибаҳои муфид мебошад. Ҳамин аст, ки ҳадафи аслии лоиҳа, пеш аз ҳама, баланд бардоштани сатҳи касбии кормандони воситаҳои ахбори омма ва ҳамкории созанда байни мақомот мебошад.

Ҳамкории судманд байни рӯзноманигорон ва марказҳои матбуотии мақомоти давлатӣ ҷавобгӯи манфиатҳои соҳавии ҳар вазорату идораи давлатӣ буда, ба ин восита фаъолияти ниҳоди дахлдор дар фазои иттилоотӣ ба шакли зарурӣ пешкаши ҷомеаи ҷаҳонӣ гардонида мешавад. Аз ин рӯ ин лоиҳа барои рушд ва пешрафти марказҳои матбуотии вазорату идораҳои мамлакат зарур ва саривақтӣ мебошад.

Ёдовар мешавем, ки дар доираи лоиҳа бо иштироки мутахассисони соҳа ва рӯзноманигорони ботаҷриба машғулияти амалии омӯзишӣ гузаронида мешавад.

АКС: АМИТ «Ховар»