Дар Турсунзода курсҳои ФИФА барои доварони Тоҷикистон оғоз шуданд

ДУШАНБЕ, 11.07.2025 /АМИТ «Ховар»/. Дар чаҳорчӯби омодагии доварони футболи Тоҷикистон ба нимаи дуюми мавсим, 10 июл дар шаҳри Турсунзода курсҳои панҷрӯзаи «FIFA MA Elite Referees Course» шуруъ шуданд.

Тавре ба АМИТ «Ховар» аз Федератсияи футболи Тоҷикистон хабар доданд, дастурдиҳандаи асосии курсҳо инструктори ФИФА Лим Ки Чонг Ан Ян аз Маврикий мебошад, ки дар ду Ҷоми ҷаҳон – солҳои 1994 ва 1998 кор кардааст. Фитнес-инструктори курсҳо дастурдиҳандаи ФИФА ва КФО Юлия Тарасова аз Узбекистон мебошад.

Дар машғулиятҳо 35 нафар довари футбол – 14 довари марказӣ ва 21 ёвар иштирок мекунанд. Илова бар ин, дар байни иштирокчиён ду дастурдиҳанда аз Тоҷикистон – Умед Раҳимов инструктори техникӣ ва Кристина Пронженко – фитнес-инструктор ҳам ҳастанд.

Курсҳои панҷрӯзаи ФИФА барои доварон дар Тоҷикистон аз дарсҳои назариявӣ ва амалӣ иборат буда, 14 июл ба поён мерасанд.

АКС: Федератсияи футболи Тоҷикистон