Сокинони деҳаҳои Ҷамоати деҳоти Навободи шаҳри Турсунзода бо оби тозаи нӯшокӣ таъмин гардиданд

ТУРСУНЗОДА, 24.07.2025 /АМИТ «Ховар»/.  Ба ифтихори ҷашни 34-солагии Истиқлоли давлатӣ дар деҳаҳои Ортиқ Ҷумаев ва Темурмалики Ҷамоати деҳоти Навободи шаҳри Турсунзода  нуқтаҳои оби нӯшокӣ мавриди истифода қарор гирифтанд. Дар ин хусус ба хабарнигори  минтақавии АМИТ «Ховар» Субҳониддини Маҳмуд аз  Мақомоти иҷроияи ҳокимияти давлатии шаҳри Турсунзода иттилоъ доданд.

Сокинони деҳаҳои Ортиқ Ҷумаев ва Темурмалик солҳо боз ба мушкилоти нарасидани оби нӯшокии тоза гирифтор буданд. Хушбахтона,  бо ташаббуси яке аз шахсони саховатпеша, соҳибкори ватандӯст Ибодулло Имомов аз чуқурии 190 метр об бароварда, сокинони зиёда аз 500 хоҷагии деҳаи Ортиқ Ҷумаевро бо оби тозаи нӯшокӣ таъмин намуданд. Ин ташаббуси неку шоистаи соҳибкор сабаби хушҳолии тамоми сокинони деҳа гардид.

Раиси шаҳри Турсунзода Парвиз Акрамзода барои чунин амали хайр ба соҳибкор миннатдорӣ баён намуд. Ҳамчунин сокинону фаъолони деҳа даъват шуданд, ки дар ояндаи наздик бо мақсади баланд бардоштани сатҳи таълиму тарбияи насли наврас дар деҳа як кӯдакистони наву замонавӣ сохта, ба истифода дода шавад. Аҳли деҳа ин таклифи роҳбарияти шаҳрро бо ҳамовозӣ дастгирӣ карда, ваъда доданд, ки аз пайи иҷрои ин иқдом мешаванд.

Ҳамчунин бо дастгирии  аҳли деҳаи Темурмалики Ҷамоати деҳоти Навобод аз чуқурии 180 метр оби тозаи нӯшокӣ  бароварда шуд. Ин оби ошомиданӣ ба тамоми манзилҳои истиқоматии деҳа тақсим карда шуд. Ташаббускории сокинони деҳоти Навобод дар доираи ҷашни бузургу таърихии 35-солагии Истиқлолияти давлатии Ҷумҳурии Тоҷикистон амалӣ гардид.

Сокинони деҳаи Темурмалик бо дастгирии Мақомоти иҷроияи ҳокимияти давлатии шаҳри Турсунзода дар оянда низ созандагию бунёдкориро идома дода, дар рушду пешрафти диёр ҳиссаи арзанда мегузоранд.

АКС: Мақомоти иҷроияи ҳокимияти давлатии шаҳри Турсунзода