35-СОЛАГИИ ИСТИҚЛОЛИ ДАВЛАТӢ. Дар Хуҷанд биноҳои Маркази саратоншиносӣ ва Маркази эндокринология бунёд карда мешаванд

 ДУШАНБЕ, 22.08.2025. /АМИТ «Ховар»/. Ба истиқболи 35-солагии Истиқлоли давлатии Ҷумҳурии Тоҷикистон дар шаҳри Хуҷанд якчанд иншооти соҳаҳои маорифу тандурустӣ, варзиш ва биноҳои маъмурӣ бунёд карда мешаванд. Дар ин хусус ба АМИТ «Ховар» аз хадамоти матбуоти Раиси вилояти Суғд иттилоъ доданд.

Дар шаҳри Хуҷанд сохтмони бинои иловагии гимназияи №-4 идома дорад. Бинои иловагӣ аз 4 ошёна ва 32 синфхона иборат мебошад.

Ҳамчунин дар шаҳр биноҳои Маркази саратоншиносии  6-ошёна бо 160 кат, Палатаи савдо ва саноат, Суди вилояти Суғд, Маркази эндокринология барои 200 кат, бинои 7-ошёнаи Беморхонаи клиникавии №1 бо 200 кат, Маҷмааи варзишии «Суғд Арена» барои тамрини 1000 варзишгар ва кӯдакистонҳо сохта мешаванд.

Ёдовар мешавем, ки ба истиқболи ҷашни 35-солагии Истиқлоли давлатӣ дар шаҳри Хуҷанд бунёди 950 иншооти таъйиноти гуногун дар назар аст. То имрӯз 900 иншоот мавриди истифода қарор гирифтааст, ки беш аз 94 фоизи иҷрои нақшаро ташкил медиҳад.

АКС: Хадамоти матбуоти Раиси вилояти Суғд