Дар Ҳисор мусобиқаи «CAFA Nations Сup 2025» дар гурӯҳи «В» оғоз мешавад

ДУШАНБЕ, 29.08.2025 /АМИТ «Ховар»/. Имрӯз, 29 август дар Варзишгоҳи марказии Ҳисор мусобиқаи дуюми «CAFA Nations Cup» таҳти сарпарастии Ассотсиатсияи футболи Осиёи Марказӣ (CAFA) оғоз мешавад. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Дар гурӯҳи «В» дастаҳои мунтахаби Тоҷикистон, Эрон, Афғонистон ва Ҳиндустон рақобат мекунанд. Бозиҳои марҳилаи гурӯҳӣ дар як давр баргузор мешаванд.

Қабл аз оғози мусобиқа дар шаҳри Душанбе бо иштироки намояндагони Ассотсиатсияи футболи Осиёи Марказӣ (CAFA), Федератсияи футболи Тоҷикистон, масъулони мусобиқа ва менеҷерони тимҳои миллии Тоҷикистон, Эрон, Афғонистон ва Ҳиндустон ҷаласа баргузор шуд.

Маросими ифтитоҳи мусобиқаи «CAFA Nations Cup 2025» пеш аз бозии дастаҳои мунтахаби Тоҷикистону Ҳиндустон баргузор мешавад.

АКС: Федератсияи футболи Тоҷикистон