Дар ноҳияи Кӯшониён Маркази саломатӣ ифтитоҳ гардид

ДУШАНБЕ, 16.08.2025 /АМИТ «Ховар»/. 15 август дар шаҳраки Сомониёни ноҳияи Кӯшониён Маркази саломатӣ ифтитоҳ карда шуд. Дар ин хусус АМИТ «Ховар» бо истинод ба хадамоти матбуоти Раиси вилояти Хатлон хабар медиҳад.

Маркази саломатӣ дар партави дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон барои вусъат бахшидани корҳои ободонӣ ба ифтихори ҷашни 35-солагии Истиқлоли давлатии Ҷумҳурии Тоҷикистон ҳамчун иншооти ҷашнӣ бунёд шудааст.

Маркази саломатӣ дар доираи лоиҳаи «Инкишофи барвақтии кӯдакон барои густариши сармояи инсонӣ дар Тоҷикистон» бо дастгирии молиявии Бонки ҷаҳонӣ бунёд карда шудааст.

Бо бунёди бинои нав 40 мутахассиси маҳаллӣ бо ҷойи кор таъмин гардид. Бинои Маркази саломатӣ аз ду ошёна иборат буда, дорои 22 ҳуҷраи корӣ, аз ҷумла ҳуҷраҳои ташхиси ултрасадо, тибби оилавӣ, хатна, ҳуҷраи момодоя, иммунизатсия, озмоишгоҳ, ҳуҷраи муоина ва сабти барқии дил мебошад, ки ҳамарӯза ба сокинон хизмат мерасонанд.

Табибони Маркази саломатӣ вазифадор карда шуданд, ки дар вақти ташхис ва табобати беморон масъулияти бештар дошта бошанд, дар беҳдошти солимии ҷомеа саҳми арзанда гузошта, бо мардум муомилаву муносибати хуб намоянд.

АКС: Хадамоти матбуоти Раиси вилояти Хатлон