НИШАСТИ МАТБУОТӢ. 34 ҳазору 80 нафар сайёҳони дохилию хориҷӣ минтақаҳои истироҳатӣ ва мавзеъҳои таърихии ноҳияи Варзобро тамошо намуданд
ВАРЗОБ, 04.08.2025. /АМИТ «Ховар»/. Дар ноҳияи Варзоб барои дар сатҳи баланд пешвоз гирифтани ҷашни 35-солагии Истиқлолияти давлатии Ҷумҳурии Тоҷикистон сохтмони 158 иншоот ба нақша гирифта шудааст. То имрӯз 103 иншооти гуногуни ҷашнӣ мавриди истифода қарор дода шуда, ҳоло дар иншооти боқимонда корҳои сохтмонӣ ва лоиҳакашӣ идома доранд. Дар ин хусус имрӯз зимни нишасти матбуотӣ Раиси ноҳияи Варзоб Хусрав Дамонзода ба хабарнигорон иттилоъ дод.
«Имрӯзҳо дар ҳудуди ноҳия сохтмони шаш муассисаи таълимӣ идома дорад. Аз ин шумора 2 муассисаи таълимӣ аз ҳисоби маблағгузории буҷети маҳаллӣ, як муассисаи таълимӣ аз ҳисоби Вазорати маориф ва илми Ҷумҳурии Тоҷикистон ва се муассисаи таълимии дигар аз ҳисоби соҳибкорон бунёд карда мешавад. Ба ин восита мушкилоти норасоии ҷойи нишаст дар соҳаи маориф бартараф карда мешавад», — гуфт Раиси ноҳияи Варзоб.
Иброз гардид, ки дар ноҳияи Варзоб 25 ёдгории таърихӣ мавҷуд мебошад. Инҳо 17 ёдгории бостонӣ, 8 ёдгории меъмории дорои аҳамияти ҷумҳуриявӣ ва маҳаллӣ мебошанд, ки рӯйхати онҳо дар таҳияи феҳристи давлатии ёдгориҳои моддии Ҷумҳурии Тоҷикистон ба қайд гирифта шудааст. Ҳамчунин дар ноҳияи Варзоб 1000 минтақаи истироҳатӣ ба қайд гирифта шудааст. Фаъолияти 110 минтақаи истироҳатии оммавӣ мавсимӣ буда, фаъолияти минтақаҳои истироҳатии «Кохи Малика», «Варзоб-Палас», «Гулобод», «Гули майда» ва Комплекси лижаронии «Сафеддара» доимӣ мебошад. Дар онҳо барои қабули сайёҳон тамоми шароит фароҳам оварда шуда, мунтазам фаъолият менамоянд.
Мувофиқи маълумоти оморӣ, дар шашмоҳаи якуми соли 2025 34 ҳазору 80 нафар сайёҳони дохилию хориҷӣ минтақаҳои истироҳатӣ ва мавзеъҳои таърихии ноҳияи Варзобро тамошо намудаанд, ки нисбат ба ҳамин давраи соли 2024 378 нафар сайёҳ зиёд мебошад.
Зимни нишасти матбуотӣ иброз гардид, ки варзишгарони ноҳияи Варзоб дар шаш моҳи соли 2025 дар 13 мусобиқаи ҷумҳуриявӣ, 12 мусобиқаи минтақавӣ, 6 мусобиқаи байналмилалӣ ва 2 чемпионати Ҷумҳурии Тоҷикистон иштирок намуданд. Онҳо аз мусобиқаҳои ҷумҳуриявӣ 38 медал, аз мусобиқаҳои минтақавӣ 40 медал ва аз мусобиқаҳои байналмилалӣ 6 медал ба даст оварда, дар умум варзишгарони ноҳия сазовори 30 медали тилло, 31 медали нуқра ва 30 медали биринҷӣ гардиданд.
Субҳониддини МАҲМУД,
АМИТ «Ховар»
АКС: АМИТ «Ховар»
Ба муносибати Рӯзи Президент дар Душанбе хатсайри сайёҳӣ ташкил карда шуд
Дар нуҳ моҳи соли 2025 зиёда аз 90 ҳазор нафар сайёҳ мавзеъҳои таърихию фарҳангии Тоҷикистонро тамошо карданд
Имсол дар Вилояти Мухтори Кӯҳистони Бадахшон даромад аз ҳисоби хизматрасонии сайёҳон 20,4 миллион сомониро ташкил дод
РУШДИ САЙЁҲӢ. Дар Суғд шумораи сайёҳони дохилӣ ва хориҷӣ афзоиш ёфта, инфрасохтори соҳа тақвият меёбад
Имкониятҳои сайёҳии Тоҷикистон дар намоишгоҳи байналмилалии «World Travel Market – 2025» муаррифӣ мегарданд
ШАРШАРАҲОИ ЗЕБОИ БАЛҶУВОН. Табиати нотакрори ин минтақаро беш аз 45 ҳазор сайёҳон тамошо карданд
ЭЪТИРОФИ БАЙНАЛМИЛАЛӢ. «Lonely Planet» Тоҷикистонро байни самтҳои беҳтарини сайёҳии ҷаҳон ҷой дод
Намояндагони Донишгоҳи байналмилалии сайёҳӣ ва соҳибкории Тоҷикистон дар Саммити байналмилалии табодули академӣ иштирок намуданд
РУШДИ САЙЁҲӢ. Беш аз 90 ҳазор сайёҳон шаҳри бостонии Кӯлобро тамошо намуданд
Беш аз 46 ҳазор сайёҳи дохилию хориҷӣ бо мавзеъҳои зебои Данғара шинос гардиданд
РУШДИ САЙЁҲӢ. Имсол ба вилояти Хатлон беш аз 900 ҳазор сайёҳ ташриф овардааст
Пешвои миллат Эмомалӣ Раҳмон дар ҳудуди ноҳияи Данғара ба таври фосилавӣ Маркази хизматрасонии сайёҳӣ ва зиёда аз 50 километр роҳҳои мумфаршгардидаро ифтитоҳ намуданд
