Донишгоҳи байналмилалии сайёҳӣ ва соҳибкории Тоҷикистон бо донишгоҳҳои пешқадами Ҷопон робитаи мустақими академӣ ба роҳ мемонад

ДУШАНБЕ, 19.09.2025 /АМИТ «Ховар»/. Дурнамои ҳамкории Донишгоҳи байналмилалии сайёҳӣ ва соҳибкории Тоҷикистон бо   муассисаҳои таҳсилоти олии касбии Ҷопон    дар мулоқоти  ректори  Донишгоҳи байналмилалии сайёҳӣ ва соҳибкории Тоҷикистон Убайдулло Асрорзода ва  Сафири Фавқулода ва Мухтори Ҷопон дар Ҷумҳурии Тоҷикистон хонум Кейко Фурута,  роҳбари Намояндагии Агентии Ҷопон оид ба ҳамкории байналмилалӣ дар Тоҷикистон (JIKA) Имай Сэйдзю дар Душанбе баррасӣ гардид. Дар ин хусус АМИТ «Ховар» бо  истинод ба  ин донишгоҳ иттилоъ медиҳад.

Дар мулокот таъкид шуд, ки барои ба роҳ мондани робитаҳои мустақими академӣ бо донишгоҳҳои пешқадами Ҷопон дар самтҳои сайёҳӣ, соҳибкорӣ, технологияҳои рақамӣ ва рушди устувор имконияти инноватсионӣ мавҷуд мебошад. Ҳамзамон ҷонибҳо имкони ташкили таҳқиқоти илмии муштарак, табодули омӯзгорон ва донишҷӯён, инчунин таъсиси марказҳо ва озмоишгоҳҳои муштараки илмию таҳқиқотиро баррасӣ намуданд.

Таваҷҷуҳи махсус ба имконияти татбиқи лоиҳаҳои муштарак тавассути Агентии ҳамкории байналмилалии Ҷопон (JICA) зоҳир карда шуд. Он метавонад ба татбиқи технологияҳои пешқадами идоракунии соҳаи сайёҳӣ, рушди малакаҳои рақамӣ, дастгирии соҳибкории ҷавонон ва ҷалби коршиносони Ҷопонӣ барои табодули таҷрибаи пешрафта мусоидат намояд.

Кейко Фурута ва ҳамроҳонаш бо пойгоҳи омодасозии мутахассисони Донишгоҳи байналмилалии сайёҳӣ ва соҳибкории Тоҷикистон, аз ҷумла биноҳои муосири таълимӣ, марказҳо ва озмоишгоҳҳо шинос шуданд.

АКС: Донишгоҳи байналмилалии сайёҳӣ ва соҳибкории Тоҷикистон