Қоҳир Расулзода дар ҷаласаи Шурои сарони ҳукуматҳои кишварҳои аъзои ИДМ ва Намоишгоҳи байналмилалии саноатии «ИННОПРОМ-Беларус-2025» иштирок намуд

ДУШАНБЕ, 30.09.2025 /АМИТ «Ховар»/. 29 сентябр дар шаҳри Мински Ҷумҳурии Беларус ҷаласаи навбатии Шурои сарони ҳукуматҳои кишварҳои аъзои Иттиҳоди Давлатҳои Мустақил баргузор гардид, ки дар кори он Сарвазири Ҷумҳурии Тоҷикистон Қоҳир Расулзода иштирок намуд.

Дар ҷаласа доир ба вазъи кунунӣ ва дурнамои рушди ҳамкории иқтисодии кишварҳои  аъзои Иттиҳоди Давлатҳои Мустақил табодули афкор анҷом дода шуда, масъалаҳои соҳаҳои иқтисод, тиҷорат, сармоягузорӣ, саноат, кишоварзӣ, гумрук, илму маориф, сайёҳӣ, фарҳанг ва тандурустӣ баррасӣ гардиданд.

Аз рӯи натиҷаҳои ҷаласа санадҳои ниҳоӣ, аз ҷумла стратегияҳо оид ба рушди илмию технологии Иттиҳоди Давлатҳои Мустақил барои солҳои 2026-2035, рушди ҷомеаи иттилоотӣ ва иқтисоди рақамӣ то соли 2035 ва рақамикунонии долонҳои асосии бисёрмодалии нақлиётии кишварҳои аъзои Иттиҳоди Давлатҳои Мустақил тасдиқ гардиданд.

Таъкид карда шуд, ки қарорҳо ва санадҳои қабулшуда барои пешрафти минбаъдаи ин соҳаҳо заминаи мустаҳками меъёрию институтсионалӣ фароҳам меоранд.

Дар ин рӯз Сарвазири мамлакат Қоҳир Расулзода ҳамчунин дар Намоишгоҳи байналмилалии саноатии  «ИННОПРОМ-Беларус-2025» иштирок ва суханронӣ кард.

Ба таъкиди Қоҳир Расулзода, Тоҷикистон ва Беларусро риштаҳои дӯстии дерина бо ҳам мепайванданд, ки бар пояи эҳтирому эътимоди ҳамдигарӣ асос ёфтаанд. Ҳоло кишварҳо дар соҳаҳои гуногун ҳамкории густурда ба роҳ мондаанд, ки саноат дар он мавқеи калидӣ дорад.

Зимни суханронӣ Қоҳир Расулзода аз шароити фароҳамгардида барои рушди соҳаи саноат дар Тоҷикистон ёдовар шуда, гуфт, ки ба ҷалби сармоя ба соҳаҳои технологӣ ва навсозии иқтидори истеҳсолӣ таваҷҷуҳи махсус равона мегардад.

«Мо барои беҳтар гардонидани фазои сармоягузорӣ пайваста ислоҳот мегузаронем, ки амалӣ намудани хизматрасонии электронӣ барои сармоягузорон, кам кардани раванди ҳуҷҷатгузорӣ ва таъмини шаффофият аз ин ҷумла аст», — гуфт Қоҳир Расулзода.

Гуфта шуд, ки ҷониби мо ба ояндаи ҳамкорӣ бо Ҷумҳурии Беларус, махсусан, дар самти табодули технология, бунёди корхонаҳои муштарак, татбиқи лоиҳаҳо дар соҳаҳои логистика, нақлиёт ва савдои наздисарҳадӣ хушбин аст.

Сарвазири мамлакат бо ёдоварӣ аз имтиёзҳои  андозию гумрукӣ, ки 110 номгӯйро дар бар мегиранд ва шароити мусоиди кор дар минтақаҳои озоди иқтисодӣ сармоягузоронро барои татбиқи лоиҳаю барномаҳои нав дар Тоҷикистон даъват намуд.

Дар охир гуфта шуд, ки баргузории ин чорабинӣ на танҳо имконияти хуб барои намоиши дастовардҳои кишварҳои ширкаткунанда ва бахши хусусӣ аст, балки он инчунин ба табодули таҷриба, пайдо кардани шарикони нав ва татбиқи лоиҳаҳои муштарак мусоидат менамояд.