Алӣ Ғиёсуддин Муҳаммад: «Тоҷикистон имкон дорад бо истифода аз захираҳои табиӣ ба яке аз давлатҳои пешрафтаи ҷаҳон табдил гардад»

ДУШАНБЕ, 20.10.2025 /АМИТ «Ховар»/. Тоҷикистон мамлакати дорои табиати нотакрор буда, мардумонаш меҳрубону самимӣ ва хеле меҳмоннавозанд. Чунин гуфт дар суҳбат ба хабарнигори АМИТ «Ховар» Алӣ Ғиёсуддин Муҳаммад, намояндаи Алянс барои дастрасии молиявӣ (Alliance for Financial Inclusion — AFI), ки дар шаҳри Куала-Лумпури Малайзия идораи корӣ дорад.

Ёдовар мешавем, ки намояндаи Алянс барои дастрасии молиявӣ Алӣ Ғиёсуддин Муҳаммад дар Форуми байналмилалии сармоягузории «Душанбе Инвест-2025», ки аз 14 то 16 октябр дар шаҳри Душанбе доир гардид, иштирок намуда, аз он таассуроти баланд бардоштааст.

«Форуми байналмилалии сармоягузории «Душанбе Инвест-2025» дар сатҳи баланди ташкилӣ баргузор гардида, дар он масъалаҳои муҳими марбут ба ҷалби бештари сармоя ба соҳаҳои гуногуни иқтисоди Тоҷикистон баррасӣ гардиданд. Воқеан, Тоҷикистон дорои захираҳои бойи табиӣ аст, ки ба ҷалби сармоя ба ин давлат мусоидат менамоянд. Бахусус соҳаи туризм ва гидроэнергетика, ки рушди он хусусан бо назардошти бунёди иншоооти бузурги гидроэнергетикӣ, истеҳсоли энергияи «сабз» ва фароҳам оврадани инфрасохтори зарурӣ имкон медиҳад дар оянда иқтисоди Тоҷикистон пешрафта гардад ва он ба сатҳу сифати зиндагии аҳолӣ низ мусоидат менамояд. Инчунин дар самти ҷалби сармоя дар Тоҷикистон дигар заминаҳо низ мавҷуданд, ки истифодаи мақсадноки онҳо имкон медиҳад иқтисоди Тоҷикистон дар оянда ба пешравиҳои назаррас ноил гардад»,-иброз дошт ҳамсуҳбати мо.

Алӣ Ғиёсуддин Муҳаммад афзуд, ки «ман аслан аз Ҳиндустон мебошам ва дар Алянс барои дастрасии молиявӣ /AFI/ дар Куала-Лумпури Малайзия фаъолият менамоям. Ин сафари нахустини ман ба сарзамини кӯҳҳои баланд ва манзараҳои ҷолиби табиӣ –Тоҷикистон мебошад».

«То омаданам ба Тоҷикистон ман доир ба ин мамлакат аз саҳифаҳои интернетӣ маълумот доштам, аммо вақте ки омадам, дилрабоии Тоҷикистон, хусусан шукуфоии пойтахти он- шаҳри Душанберо аз наздик дидам. Ман дидам, ки Душанбе шаҳри сабз буда, хиёбонҳои гулпӯш доштааст. Бо ин ҳама зебоӣ умед аст, ки Тоҷикистон дар оянда ба яке аз кишварҳои пешрафтаи дунё табдил гардад. Дар доираи сайругаште, ки барои иштирокдорони Форуми байналмилалии сармоягузории «Душанбе инвест-2025» ташкил карда шуд, ба ман ҳамзамон муяссар гардид, ки яке аз ёдгориҳои бостонии Тоҷикистон –Қалъаи Ҳисорро тамошо намоям, ки аз дидани он хеле ба ваҷд омадам. Дар Ҳиндустон ҳам чунин қалъаҳои қадимӣ, ки ба Қалъаи Ҳисор шабеҳ ҳастанд, зиёданд. Онҳо аз ҷониби императорҳое, ки аз Осиёи Марказӣ дар қарнҳои гузашта дар Ҳиндустон ҳукмронӣ намудаанд, бунёд карда шудаанд», -гуфт ҳамсуҳбати мо.

Алӣ Ғиёсуддин Муҳаммад тазаккур дод, ки «дар Осорхонаи этнографии «Қалъаи Ҳисор» бо таъриху тамаддуни тоҷикон, ки яке аз қадимтарин халқҳои ҷаҳон мебошанд, шинос шудам. Ва мушоҳида намудам, ки тоҷикон дар ҳифзи фарҳангу тамаддун ва асолати миллию давлатдории худ иқдоми наҷибро пеша намудаанд, ки ба рушду пешрафти ин сарзамин ва мардумонаш мусоидат менамояд».

Марзия САИДЗОДА,
АМИТ «Ховар»

АКС: АМИТ «Ховар»