Дар Душанбе дар мавзуи «Пули сомонӣ-рукни давлатдории миллӣ» конфронси илмӣ-назариявӣ баргузор шуд

ДУШАНБЕ, 31.10.2025 /АМИТ «Ховар»/. Пули миллӣ на танҳо василаи молиявӣ, балки яке аз рамзҳои давлатдории миллӣ мебошад. Ин матлабро муовини якуми Сарвазири Ҷумҳурии Тоҷикистон Ҳоким Холиқзода дар Конфронси илмӣ-назариявӣ  таҳти унвони «Пули сомонӣ-рукни давлатдории миллӣ», ки  дар шаҳри Душанбе бахшида ба 25-солагии ба муомилот баровардани пули миллӣ-сомонӣ баргузор гардид, баён  намуд.

АМИТ «Ховар» бо истинод ба Бонки миллии Тоҷикистон иттилоъ медиҳад, ки  дар конфронс  Ёрдамчии Президенти Ҷумҳурии Тоҷикистон оид ба масъалаҳои иқтисодӣ Неъматулло Ҳикматуллозода, президенти Академияи миллии илмҳои Тоҷикистон Қобил Хушвахтзода, роҳбарияти Бонки миллии Тоҷикистон, вазорату мақомот ва муассисаҳои давлатӣ, намояндагони ташкилотҳои байналмилалӣ ва ташкилотҳои қарзии молиявӣ иштирок намуданд.

Ҳоким Холиқзода доир ба таърихи 25 соли ба муомилот баровардани пули миллии сомонӣ сухан намуда, аз  таърихи солҳои аввали соҳибихтиёрӣ, вазъи иқтисодӣ, барориши аввалин пули миллӣ — рубли тоҷикӣ ва баъдан сомонӣ ёдовар шуда, изҳор дошт, ки гузашти айём исбот намуд, ки қарор дар бораи ташкил намудани низоми пулии мустақил ва ба муомилот ворид гардидани пули миллӣ иқдоми дурусту саривақтӣ буд, ки барои ташаккули истиқлолияти иқтисодии мамлакат заминаи мусоид фароҳам овард».

Дар конфронс Раиси Бонки миллии Тоҷикистон Фирдавс Толибзода  иброз намуд, ки масъалаи пули миллӣ аз рӯзҳои аввали ба мақоми роҳбари давлат интихоб шудани Президенти мамлакат  муҳтарам Эмомалӣ Раҳмон дар маркази таваҷҷуҳи давлату Ҳукумати Тоҷикистон қарор дошт.

Пули миллӣ яке аз рукнҳои давлатдории миллӣ маҳсуб ёфта, санаи ба муомилот баровардани он дар таърихи давлатдории навини Тоҷикистон рӯйдоди муҳим ба ҳисоб меравад.

Иброз гардид, ки маҳз бо ибтикори шахсии Президенти Ҷумҳурии Тоҷикистон муҳтарам Эмомалӣ Раҳмон барои ба муомилот баровардани нишонаҳои нави пули миллии сомонӣ тасмим гирифта шуд.  26 октябри соли 2000 Фармони Президенти Ҷумҳурии Тоҷикистон дар хусуси аз 30 октябри соли 2000 ба муомилот баровардани воҳиди нави пули миллии кишвар «сомонӣ» ба имзо расид.

Имрӯз пули миллӣ — сомонӣ рамзи арзандаи Тоҷикистони соҳибистиқлол гардида, барои иқтисодиёти рӯ ба рушди кишвари мо ҳамчун воситаи боэътимоди муомилот хизмат мекунад. 

Дар идомаи конфронс иштирокдорон оид ба таърихи сикказанӣ дар замони ниёгон, ташаббуси  Президенти мамлакат  дар хусуси ҷорӣ кардани пули миллӣ, таърихи барориши он, интихоби симои қаҳрамонони миллат, ҷойҳои таърихӣ ва нигораҳо, унсурҳои ҳимоявии пули миллӣ сухан намуданд.

АКС: Бонки миллии Тоҷикистон