Дар Хуҷанд доир ба баланд бардоштани маърифати ҳуқуқии ҷавонон ҳамоиш баргузор гардид

ДУШАНБЕ, 10.10.2025. /АМИТ «Ховар»/. Дар ҳамоиши машваратию фаҳмондадиҳӣ дар шаҳри Хуҷанд масъалаҳо вобаста ба баланд бардоштани маърифати ҳуқуқии ҷавонон ва таъмини иҷрои дастуру супоришҳое, ки аз Паёми Президенти Ҷумҳурии Тоҷикистон ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ» бармеоянд, баррасӣ гардиданд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Хуҷанд иттилоъ медиҳад, дар ҳамоиш  масъалаҳои зиёдшавии омилҳои номатлуб дар байни аҳолӣ, хусусан ҷавонон, баланд бардоштани маърифати ҳуқуқӣ ва пешгирии ҷиноятсодиркунӣ дар байни наврасону ҷавонон мавриди баррасӣ қарор гирифтанд.

Баланд бардоштани маърифати ҳуқуқӣ заминаи боэътимоди рушди босуботи ҷомеа мебошад. Тарбияи ҳуқуқӣ ва ватандӯстӣ бояд аз кӯдакӣ ва наврасӣ дар замири ҷавонон ҷой дода шавад.

Маърифати ҳуқуқӣ маҷмуи андешаҳои одамон дар бораи қонун, татбиқи он ва фаъолияти ҳифзи ҳуқуқ мебошад, ки дар шакли дониш, эътиқод, меъёрҳо ва муносибатҳои аз ҷониби ҷомеа қабулшуда ташаккул ёфтааст. Аз ин лиҳоз, тарбияи ҳуқуқӣ ва тарбияи кадрҳои ҳуқуқӣ  ҳамчун шарти баланд бардоштани шуури ҳуқуқӣ ва механизмҳои ҳуқуқӣ дар ҳаёти ҳаррӯзаи ҷомеа бояд яке аз вазифаҳои муҳими сиёсати давлатӣ дар соҳаи маърифатнокии ҳуқуқӣ гардад.

Президенти Ҷумҳурии Тоҷикистон муҳтарам Эмомалӣ Раҳмон дар яке аз суханрониҳояшон таъкид намудаанд, ки «амалӣ намудани меъёрҳои Конститутсия ба мо имкон дод, ки пояҳои устувори ҷомеа ва давлатро созмон диҳем, сулҳу оромӣ, суботи сиёсӣ ва ваҳдати миллиро таҳким бахшем, рушди устувори иқтисодии мамлакатамонро таъмин намоем, барои ҳар шаҳрванди ҷумҳурӣ шароити зиндагии арзанда ва инкишофи озодона муҳайё созем».

АКС: Мақомоти иҷроияи ҳокимияти давлатии шаҳри Хуҷанд