Эмомалӣ Раҳмон: «Тоҷикистон ба маркази калидии нақлиётӣ ва энергетикӣ дар Осиёи Марказӣ табдил меёбад»
ДУШАНБЕ, 14.10.2025. /АМИТ «Ховар»/. Имрӯз Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар Форуми байналмилалии сармоягузории «Душанбе Инвест – 2025» иброз намуданд, ки «мавқеи стратегии мамлакат имкон медиҳад, ки Тоҷикистон ба маркази калидии нақлиётӣ ва энергетикӣ дар Осиёи Марказӣ табдил ёбад».
Сарвари давлат тазаккур доданд, ки яъне долонҳои нақлиётию иқтисодии муосир аз тариқи ҳудуди Тоҷикистон давлатҳои Осиёи Марказиро бо кишварҳои Осиёи Ҷанубӣ ва Чин мепайванданд.
Ба таҳлили коршиносон, Тоҷикистон дар яке аз чорроҳаҳои калидии Авруосиё воқеъ аст, ки метавонад пули пайвасткунандаи Чин ва давлатҳои дигари ҳамсояи минтақа бошад. Тоҷикистон бо мавқеи ҷойгиршавиаш ва бунёд намудани роҳҳои дорои аҳамияти байналмиллалӣ яке аз долонҳои нақлиётӣ, энергетикӣ ва тиҷоратӣ байни мамлакатҳои Осиёи Марказӣ, Осиёи Ҷанубӣ ва Иттиҳоди Аврупо мебошад.
Тоҷикистон барои муаррифӣ намудани мамлакат ба ҳайси қаламрави транзитӣ ба дастовардҳои назаррас ноил гардидааст, зеро имрӯз тавассути долонҳои нақлиётии байналмилалӣ, ба мисли роҳҳои мошингарди Осиё, ЕврАзЭС, ТРАСЕКА, ЦАРЭС, ЕС, ки қаламрави Ҷумҳурии Тоҷикистонро убур мекунанд, ҳамлу нақли транзитӣ хуб ба роҳ монда шудааст.
Давоми 34-соли Истиқлолияти давлатии Ҷумҳурии Тоҷикистон бо мақсади беҳтар намудани инфрасохтори нақлиётӣ ва ба мамлакати транзитӣ табдил додани ҷумҳурӣ беш аз 63 лоиҳаи давлатии сармоягузорӣ амалӣ гардид.
Бояд гуфт, ки Тоҷикистон дар раддабандии ҷаҳонии соли 2024 аз ҳисоби нишондиҳандаи сифати роҳҳо зинаҳои болотарро ишғол намуд, ки ин рушди соҳаи нақлиёти мамлакатро таҷассум намуд. 28 декабри соли 2024 Президенти Тоҷикистон, Пешвои миллат муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон чунин иброз намуданд: «Бо таҷдиду навсозии роҳҳои мошингард дар панҷ соли охир тибқи арзёбии Форуми ҷаҳонии иқтисодӣ мавқеи Тоҷикистон дар раддабандии ҷаҳонӣ аз рӯи нишондиҳандаи сифати роҳҳо дар байни 165 давлати ба таҳқиқот фарогирифта аз зинаи 50 ба 44-ум баромада, нисбат ба солҳои қаблӣ 6 зина баланд гардид».
Ёдовар мешавем, ки дар замони соҳибистиқлолии мамлакат сохтмони роҳи оҳани Қӯрғонтеппа — Кӯлоб ва якчанд шоҳроҳи байналмилалӣ, нақбҳо ва пулҳои байнимарзӣ низ анҷом дода шуд. Дар натиҷаи он Тоҷикистон ба қаламрави воҳид табдил ёфта, рафтуомади доимӣ ба тамоми минтақаҳои мамлакат ва дар чор самт ба давлатҳои ҳамсоя таъмин гардид.
АКС: Хадамоти матбуоти Президенти Ҷумҳурии Тоҷикистон/АМИТ «Ховар»
Вазири молияи Тоҷикистон дар Бангкок бо роҳбарияти Фонди кувайтии рушди иқтисодиёти араб мулоқот намуд
Дар доираи Форуми соҳибкории «Тоҷикистон, ба пеш!» ду Ёддошти тафоҳум дар соҳаи энергетика ба имзо расид
Дар 25 соли охир аз ҷониби соҳибкорон зиёда аз 4 миллион ҷойи кор таъсис дода шудааст
Дар Душанбе татбиқи «Барномаи рушди таҳвилгарон ва содирот» бо ҳайати Гурӯҳи Бонки ҷаҳонӣ баррасӣ гардид
Дурнамои рушди ҳамкорӣ байни Тоҷикистон ва Чехия дар соҳаи нақлиёти роҳи оҳан баррасӣ гардид
Масъалаи истифодаи механизмҳои нави маблағгузорӣ барои татбиқи лоиҳаҳои афзалиятноки Тоҷикистон дар Бангкок баррасӣ шуд
РУШДИ ИҚТИСОДИ МИЛЛӢ. Дар нуҳ моҳи соли 2026 8,3 фоиз таъмин гардид
Олимони тоҷик парвариши гандуми тирамоҳӣ ва пахтаро дар шароити тағйирёбии иқлим баррасӣ намуданд
Ҷалби сармоя барои татбиқи лоиҳаҳои афзалиятноки Тоҷикистон дар Бангкок баррасӣ гардид
«СОҲИБКОРИИ ЗАНОН: ИМКОНИЯТҲО, НАВОВАРӢ ВА РУШДИ УСТУВОР».Таҳти ин унвон ҳамоиш баргузор шуд
Дар мавзуи дастгирии соҳибкорӣ дар 35 соли Истиқлоли давлатӣ ҳамоиш баргузор шуд
Дар Рим имкониятҳои содиротии маҳсулоти кишоварзии Тоҷикистон муаррифӣ гардиданд
