Кишоварзони ноҳияи Данғара нақшаи ҷамъоварии пахтаро пурра иҷро намуданд

ДУШАНБЕ, 13.10.2025. /АМИТ «Ховар»/. Кишоварзони ноҳияи Данғара нақшаи истеҳсоли пахтаро пурра иҷро намуда, то имрӯз 10 ҳазору 700 тонна пахта ҷамъоварӣ намуданд.

Тавре аз хадамоти матбуоти Раиси вилояти Хатлон иттилоъ доданд, дар байни 19 шаҳру ноҳияи пахтакори вилояти Хатлон то имрӯз панҷ шаҳру ноҳия — Левакант, Бохтар, Дӯстӣ, Ёвон ва Данғара нақшаи пахтаро пурра иҷро намудаанд.

Нақшаи 19 шаҳру ноҳияи пахтакори вилояти Хатлон имсол 254 ҳазору 300 тонна мебошад. То имрӯз 202 ҳазор 592,2 тонна пахта ҷамъоварӣ шудааст, ки ба 80 дарсади нақшаи солона баробар мебошад.

Рушди соҳаи пахтакорӣ пас аз ҳадафи чоруми стратегии миллӣ эълон шудани саноатикунонии босуръати мамлакат аҳамияти боз ҳам бештар касб намуд. Барои таъмини  корхонаҳои саноатии мамлакат бо ашёи хом истеҳсоли пахта бояд сол ба сол зиёд гардад.

Зеро аз 1 тонна пахта вобаста ба навъ ба ҳисоби миёна 300-350 кило нах ва 560-580 кило тухмӣ  гирифта мешавад. Аз ин миқдор нах 350-400  метри мураббаъ матоъ ва аз тухмӣ 100-120  кило равған, тақрибан 270  кило кунҷора ва 170 кило пасмондаи пӯсти чигит истеҳсол кардан мумкин аст.

Рушди соҳаи пахтакорӣ афзалияти зиёд дошта, ба рушди бемайлони иқтисодиёти мамлакат, хусусан саноат таъсири мусбат мерасонад. Барои гирифтани ҳосилнокии зиёд бояд аз таҷрибаи бисёрсолаи илмӣ истифода намуд.

АКС: Хадамоти матбуоти Раиси вилояти Хатлон