Кишоварзони вилояти Хатлон нақшаи ҷамъоварии пахтаро 90 фоиз иҷро намуданд

ДУШАНБЕ, 21.10.2025. /АМИТ «Ховар»/. Кишоварзони вилояти Хатлон нақшаи ҷамъоварии пахтаро ба андозаи 90 фоиз иҷро намуданд. То имрӯз нуҳ шаҳру ноҳияи вилоят нақшаи ҷамъовариро пурра иҷро кардаанд. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Имсол нақшаи ҷамъоварии пахта дар 19 шаҳру ноҳияи вилояти Хатлон 254 ҳазору 300 тонна муқаррар гардидааст. То 20 октябр 228 ҳазору 157,3 тонна пахта ҷамъоварӣ карда шудааст.

Дар байни 19 шаҳру ноҳияи пахтакор то имрӯз нуҳ шаҳру ноҳия — Левакант, Бохтар, Дӯстӣ, Ёвон, Данғара, Вахш, Хуросон, Ҷайҳун ва Ҷалолиддини Балхӣ нақшаро пурра иҷро намудаанд.

Пахтакорӣ дар Тоҷикистон яке аз соҳаҳои асосии стратегии ҷумҳурӣ дониста шуда, тавассути коркарди пахта зиёда аз 300 намуд маҳсулот истеҳсол мегардад.

Ин зироатро бештар барои нах парвариш менамоянд. Дар баробари нах аз он чигит, ғӯзапоя, равған, хӯроки чорво ва дигар намуди маҳсулот истеҳсол карда мешавад. Нахи пахта ашёи асосии он мебошад. Пахтае, ки дар Тоҷикистон парвариш карда мешавад, аз 34 то 35 фоиз баромади нах дорад. Ҳамчунин мо навъҳое дорем, ки фоизи баромади нахашон ба 39-40 фоиз мерасад.

АКС: Хадамоти матбуоти Раиси вилояти Хатлон