Ҳаҷми маблағгузории иқлимӣ барои кишварҳои дар ҳоли рушд ҷиҳати татбиқи 22 лоиҳа тасдиқ гардид

ДУШАНБЕ, 05.11.2025 /АМИТ «Ховар»/. Дар  ҷаласаи 43-уми Шурои идоракунандагони Фонди иқлими сабз, ки дар шаҳри Инчхони Корея баргузор шуд, аз ҷониби Шуро ҳаҷми рекордии маблағгузории иқлимӣ барои кишварҳои  дар ҳоли рушд ҷиҳати татбиқи 22 лоиҳаи нав, аз ҷумла Барномаи нави минтақавӣ таҳти унвони «Аз пиряхҳо то хоҷагидорон», ки  аз ҷониби Бонки осиёгии рушд маблағгузорӣ карда мешавад, тасдиқ гардид. Дар ин хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Лоиҳаи мазкур дар ҷумҳуриҳои Тоҷикистон, Озарбойҷон, Узбекистон, Қазоқистон, Қирғизистон, Арманистон, Туркманистон, Гурҷистон ва Покистон амалӣ карда мешавад.

Сармоягузорӣ дар самтҳои марбут ба идоракунӣ ва истифодаи оқилонаи захираҳои табиӣ, баланд бардоштани маҳсулнокии кишоварзӣ, беҳтар намудани сатҳи зиндагии аҳолӣ, хизматрасониҳои гидрометеорологӣ ва ҷорӣ намудани механизми сармоягузории «сабз»  аз ҳадафҳои асосии ин тарҳ мебошад.

Ҳамзамон дар ҷаласа, ки аъзои Шуро, мақомотҳои миллӣ оид ба масъалаҳои фонди мазкур, ташкилотҳои аккредитатсияшудаи фонд ва нозирон иштирок доштанд, дархости Ҷумҳурии Тоҷикистон дар хусуси баргузории ҷаласаи 45-уми Шурои Фонди иқлими сабз, санаи 29 июн то 2 июли соли 2026 тасдиқ гардид.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон