Ба муносибати Рӯзи Президент дар Душанбе хатсайри сайёҳӣ ташкил карда шуд

ДУШАНБЕ, 14.11.2025 /АМИТ «Ховар»/. Имрӯз бо ташаббуси Мақомоти иҷроияи ҳокимияти давлатии шаҳри Душанбе ба муносибати Рӯзи Президенти Ҷумҳурии Тоҷикистон, бо мақсади  шиносоӣ бо таърихи фаъолият ва корномаи давлатсозии Президенти Ҷумҳурии Тоҷикистон муҳтарам Эмомалӣ Раҳмон хатсайри сайёҳӣ ташкил карда шуд.

Тавре хабарнигори АМИТ «Ховар» хабар медиҳад, хатсайри сайёҳӣ бо ҷалби роҳбарону кормандони воҳидҳои сохтории дастгоҳи Раиси шаҳри Душанбе, Мақомоти иҷроияи ҳокимияти давлатии шаҳри Душанбе ва ноҳияҳои он, кормандони соҳаи тиб, омӯзгорон, ҷавонону варзишгарон ва донишҷӯёни муассисаҳои таҳсилоти олии касбии ҳудуди шаҳри Душанбе баргузор гардид.

Дар доираи хатсайр аз ҷониби роҳбаладон вобаста ба имконияти сайёҳии шаҳри Душанбе маълумоти муфассал пешниҳод гардид.

Иштирокчиёни хатсайри сайёҳӣ бо Осорхонаи Ҳизби Халқии Демократии Тоҷикистон шинос гардиданд.

Иттилоъ дода шуд, ки 10 апрел бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси Миллии Маҷлиси Олии Ҷуҳурии Тоҷикистон, Раиси шаҳри Душанбе муҳтарам Рустами Эмомалӣ бинои нави Ҳизби Халқии Демократии Тоҷикистон ба истифода дода шуд.

Бинои нави Ҳизби Халқии Демократии Тоҷикистон дорои ҳуҷраҳои муҷаҳҳаз, осорхона, толорҳои маҷлис, китобхонаи электронӣ ва анъанавӣ, ошхона ва дигар иншооти ёрирасон мебошад.

Иброз гардид, ки гӯшаҳои алоҳида, ки дар Осорхонаи Ҳизби Халқии Демократии Тоҷикистон таъсис дода шудаанд, ба ташаккули маълумоти ҳар бинанда аз масири таърихии тоҷикон мусоидат менамоянд. Таърихи ниёгон, Тоҷикистони Шуравӣ, Иҷлосияи тақдирсози 16-уми Шурои Олии Ҷумҳурии Тоҷикистон, таъсиси Ҳизби Халқии Демократии Тоҷикистон, Неругоҳи барқи обии «Роғун» ташаббусҳои ҷаҳонии Пешвои миллат муҳтарам Эмомалӣ Раҳмон ва дигар маълумоту навгониҳои Тоҷикистони соҳибистиқлол аз ҷумлаи бахшҳо дар осорхона мебошанд.

Дар ин ҷо маълумот аз давраҳои гуногуни давлатдории тоҷикон, фаъолияти ҳизб ва дастоварду музаффарияти Тоҷикистон бо роҳи ҷамъоварии аксу аёният ва маводи чопӣ нигаҳдорӣ мешаванд.

Иштирокчиёни хатсайр дар кинотеатри «Ватан» филми мустанaди «Эмомалӣ Раҳмон – ҳомии сулҳи ҷаҳон»-ро тамошо карданд. Филм фаъолияти Пешвои миллат муҳтарам Эмомалӣ Раҳмонро дар роҳи барқарорсозии сулҳи тоҷикон, таҳкими ваҳдати миллӣ, рушди устувори мамлакат ва иштироки созандаи Тоҷикистон дар масъалаҳои мубрами байналмилалӣ инъикос менамояд. Тамошои филм ба иштирокчиён имкон дод, ки нақши калидии Тоҷикистон ва сиёсати бунёдкоронаи Сарвари давлатро дар таҳкими субот ва амнияти минтақавӣ амиқтар дарк намоянд.

Бояд гуфт, ки Мақомоти иҷроияи ҳокимияти давлатии шаҳри Душанбе мунтазам барои таҷлили сазовори Рӯзи Президенти Ҷумҳурии Тоҷикистон ва дар замиру ботини сокинони пойтахт тарбият намудани ҳисси шукргузорӣ аз неъматҳои даврони соҳибистиқлолӣ ва омӯзишу арҷгузорӣ ба хизматҳои бесобиқаи Пешвои миллат муҳтарам Эмомалӣ Раҳмон тадбирҳои гуногун меандешад.

Таҷлили Рӯзи Президенти Ҷумҳурии Тоҷикистон эҳтирому эътирофи фазилати сиёсатмадорӣ дар давраи давлатдории навини мамлакат, таъмини сулҳу ваҳдату ягонагӣ дар сарзамин, рушди босуботи мамлакат ва болоравии обруву нуфуз ва мақоми Тоҷикистони соҳибистиқлол дар арсаи байналмилалӣ мебошад. Ин ҳама аз салоҳиятнокӣ, фаъолияти босамар ва соҳибхирадии Президенти Ҷумҳурии Тоҷикистон муҳтарам Эмомалӣ Раҳмон сарчашма мегирад.

Моҳинави НАВРӮЗ,
АМИТ «Ховар»

АКС: шуъбаи рушди сайёҳии Мақомоти иҷроияи ҳокимияти давлатии шаҳри Душанбе