Дар Донишгоҳи давлатии Кӯлоб дар мавзуи моҳияти иқтисоди сабз конференсия баргузор шуд

ДУШАНБЕ, 25.11.2025 /АМИТ «Ховар»/. 25 ноябр дар Донишгоҳи давлатии Кӯлоб ба номи Абуабдуллоҳи Рӯдакӣ таҳти унвони «Иқтисоди сабз ҳамчун омили асосӣ оид ба беҳдошти вазъи экологии ҳавои атмосферӣ» конференсияи илмӣ-назариявӣ баргузор шуд, хабар доданд ба АМИТ «Ховар» аз ин донишгоҳ.

Дар конференсия аҳамияти иқтисоди сабз ва зарурати таҳқиқи роҳҳои коҳиши ифлосшавии ҳавои атмосферӣ таъкид шуда, нақши омӯзиши илмӣ ва ҳамкории байналмилалӣ дар ҳалли мушкилоти экологӣ муҳим арзёбӣ гардид.

Дар мавзуъҳои «Парваришу нигоҳдории растаниҳои ороишӣ ва гулҳои мавсимӣ — омили ташаккули маърифати экологии хонандагону донишҷӯён», «Таъсири гармшавии иқлим ба муҳити зисти пиряхҳои Осиёи Марказӣ», «Мушкилоти экологӣ, сабаб ва оқибатҳои фоҷиабори он ба ҳаёти инсон», «Нақши Ҷумҳурии Тоҷикистон дар ҳалли мушкилоти глобалии экологӣ» маърӯзаъҳо пешниҳод гардиданд.

Таъкид шуд, ки хурдшавии пиряхҳо ба масъалаҳои таъминоти об, экосистемаҳо ва амнияти экологӣ таъсири ҷиддӣ мерасонад.

Маърӯзачиён саҳми Ҷумҳурии Тоҷикистонро дар ҳалли масъалаҳои глобалии обу иқлим муҳим арзёбӣ намуда, иброз доштанд, ки баррасии масъалаҳои муҳими экологӣ ва иқтисоди сабз барои рушди устувори ҷумҳурӣ аҳамияти калон дорад.

АКС: Донишгоҳи давлатии Кӯлоб ба номи Абуабдуллоҳи Рӯдакӣ