Дар Донишгоҳи давлатии тиҷорати Тоҷикистон Стратегияи муқовимат ба терроризм ва экстремизм дар Ҷумҳурии Тоҷикистон баррасӣ гардид

ДУШАНБЕ, 27.11.2025 /АМИТ «Ховар»/. 26 ноябр дар Донишгоҳи давлатии тиҷорати Тоҷикистон вохӯрии намояндагони мақомоти ҳифзи ҳуқуқи шаҳри Душанбе бо омӯзгорону донишҷӯён дар мавзуи «Амалисозии Стратегияи муқовимат ба экстремизм ва терроризм дар Ҷумҳурии Тоҷикистон» баргузор гардид.

Тавре  АМИТ «Ховар» бо истинод ба ин донишгоҳ хабар медиҳад, дар ҷамъомад масъалаҳои мубрами рӯз, аз қабили хатарҳои эҳтимолии дохилшавии ҷавонон ба гурӯҳҳои террористӣ ва экстремистӣ, сатҳи ҷинояту ҷинояткорӣ, махсусан дар байни ҷавонону наврасон ва истифодаи маводи мухаддир мавриди баррасӣ қарор гирифтанд.

Зарурати таҳкими ҳамкорӣ байни сохторҳои давлатӣ, муассисаҳои таълимӣ, ҷомеаи шаҳрвандӣ ва воситаҳои ахбори омма таъкид карда шуд.

Иброз гардид, ки таҳкими тартиботи ҳуқуқӣ, эҳтироми қонун ва тарбияи маънавии ҷавонон вазифаи умумии ҷомеа буда, донишҷӯён ҳамчун насли созанда бояд дар ин ҷода пешсаф бошанд.

АКС: Донишгоҳи давлатии тиҷорати Тоҷикистон