Доир ба афзалияти татбиқи манфиатҳои муҳими Тоҷикистон дар Осиёи Марказӣ ҳамоиш баргузор шуд

ДУШАНБЕ, 30.11.2025 /АМИТ «Ховар»/. 28 ноябр дар Маркази тадқиқоти стратегии назди Президенти Ҷумҳурии Тоҷикистон таҳти унвони «Афзалияти татбиқи манфиатҳои ҳаётан муҳимми Ҷумҳурии Тоҷикистон дар Осиёи Марказӣ» ҳамоиш доир шуд. Дар ин хусус ба АМИТ «Ховар» аз хадамоти матбуоти Маркази тадқиқоти стратегии назди Президенти Ҷумҳурии Тоҷикистон хабар доданд.

Зимни ҳамоиш масъалаҳои таҳлили назариявии шинохти манфиатҳои миллии Ҷумҳурии Тоҷикистон, инкишофи муносибатҳои боварӣ, дӯстӣ ва ҳамкорӣ бо кишварҳои минтақаи Осиёи Марказӣ, тасмимҳои давлатӣ барои ҳимоя ва таҳкими Истиқлолияти давлатӣ, эҷоди навори амниятӣ дар марзҳои мамлакат, мусоидат ба фаъолияти созандаи шаҳрвандони Ҷумҳурии Тоҷикистон дар хориҷи кишвар, афзалияти татбиқи манфиатҳои ҳаётан муҳими иқтисодӣ ва энергетикии Ҷумҳурии Тоҷикистон дар Осиёи Марказӣ мавриди баррасии ҳамаҷонибаи коршиносон қарор гирифтанд.

Иброз гардид, ки шинохти назариявии манфиатҳои миллӣ ва давлатӣ, инчунин манфиатҳои ҳаётан муҳими Ҷумҳурии Тоҷикистон дар замони муосир ва тағйирпазири ҷомаи ҷаҳонӣ яке аз масъалаҳои мубрам ба шумор меравад. Дар ин замина таъмини манфиатҳои миллӣ, дарки дурусти манфиатҳои ҳаётан муҳими Ҷумҳурии Тоҷикистон омили таъмини рушди устувори соҳаҳои ҳаёти мамлакат мегардад.

Масъалаи дастёб шудан ба ҳадафҳои муҳиму стратегии Тоҷикистон, ки дар низоми манфиатҳои миллии давлат ҷойгоҳи махсусро соҳиб мебошад, мавриди таваҷҷуҳи ҳамешагии Президенти Ҷумҳурии Тоҷикистон муҳтарам Эмомалӣ Раҳмон қарор гирифтааст.

Тазаккур дода шуд, ки манфиатҳои миллӣ вобаста ба шароит ва вазъияти мавҷуда, рушди босуръати техника ва технология метавонанд шаклан ва моҳиятан тағйир ёбанд, вале манфиатҳои ҳаётан муҳимми давлатӣ, новобаста аз вазъияту шароити минтақа ва ҷаҳон аҳаммияти аввалиндараҷа доранд.

АКС: Хадамоти матбуоти Маркази тадқиқоти стратегии назди Президенти Ҷумҳурии Тоҷикистон