Ҳамкории Тоҷикистон ва Кувайт дар соҳаҳои синамо ва авиатсия густариш меёбад

ДУШАНБЕ, 24.12.2025 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Давлати Кувайт Зубайдулло Зубайдзода бо муовини раиси Шурои директорони муассисаи синамои миллии Кувайт Ҳишом Фаҳд Ал-Ғоним мулоқот намуд.

Тавре ба АМИТ «Ховар» аз Сафорати Ҷумҳурии Тоҷикистон дар Давлати Кувайт хабар доданд, дар мулоқот масъалаҳои таҳким ва тавсеаи ҳамкории дуҷониба дар соҳаҳои фарҳанг ва синамо баррасӣ гардид.

Зимни мулоқот омодагии ҷонибҳо ҷиҳати татбиқи ташаббусҳо ва баргузории чорабиниҳои муштарак дар соҳаи фарҳангу синамо таъкид гардид.

Ҳамучнин Сафири Фавқулода ва Мухтори Ҷумҳурии Тоҷикистон дар Давлати Кувайт Зубайдулло Зубайдзода зимни мулоқот бо раиси Шурои директорони ширкати ҳавопаймоии «Kuwait Airways» Абдулмуҳсин Солим Ал-Фақъон масъалаҳои вобаста ба рушди ҳамкории дуҷониба дар соҳаи авиатсияи гражданӣ, аз ҷумла  ба роҳ мондани парвозҳои мустақим  байни Душанбе ва Кувайтро аз ҷониби ширкати ҳавопаймоии «Kuwait Airways» баррасӣ намуд.

АКС: Сафорати Ҷумҳурии Тоҷикистон дар Давлати Кувайт