ЧЕМПИОНАТИ ҶАҲОН ОИД БА БОКС. Муштзанҳои ҷавони тоҷик соҳиби медалҳои нуқра ва биринҷӣ гардиданд
ДУШАНБЕ, 15.12.2025 /АМИТ «Ховар»/. Муштзани ҷавони тоҷик Хусравхон Раҳимов дар рӯзи охири Чемпионати ҷаҳон оид ба бокс дар шаҳри Дубайи Амороти Муттаҳидаи Араб сазовори медали нуқра гардид. Дар ин хусус ба шореҳи варзиши АМИТ «Ховар» аз Федератсияи бокси Тоҷикистон хабар доданд.
Хусравхон Раҳимов дар вазни 57 кг дар даври аввал ба муқобили намояндаи Лесото Тока Литабе ба тариқи нокаут дар раунди дуюм пирӯзӣ ба даст оварда, ба марҳилаи чаҳорякниҳоӣ роҳ ёфт. Ӯ дар марҳилаи чаҳорякниҳоӣ бо намояндаи Африқои Ҷанубӣ- Сигвела Масибулеле неру санҷид ва бо қарори доварон бо ҳисоби 5:0 пирӯз шуда, ба марҳилаи нимниҳоӣ баромад.
Хусравхон Раҳимов дар марҳилаи нимниҳоӣ бо қарори якдилонаи доварон бо ҳисоби 5:0 бар Хуҷаназар Нортоҷиев аз Узбекистон ғалаба карда, ба финал баромад. Ҳамин тавр, ӯ аввалин муштзани тоҷик шуд, ки ба финали Чемпионати ҷаҳон роҳ ёфт. Дар финал Хусравхон Раҳимов бо намояндаи Қазоқистон – Оразбек Асилқулов рақобат карда, бо қарори якдилонаи доварон бо ҳисоби 5:0 мағлуб шуд ва соҳиби медали нуқра гардид.
Хотиррасон мешавем, ки ин аввалин медали нуқра дар таърихи бокси Тоҷикистон дар мусобиқаҳои Чемпионати ҷаҳон мебошад. Ба ғайр аз медали нуқра ба Хусравхон Раҳимов дар ҳаҷми 150 000 $ ҷоиза тақдим карда шуд.
Ҳамчунин дар Чемпионати ҷаҳон оид ба бокс дар шаҳри Дубай муштзани 25-солаи тоҷик, чемпиони Осиё дар соли 2024 Акмал Убайдов дар вазни 60 кг соҳиби нишони биринҷӣ ва ҷоизапулӣ дар ҳаҷми 75 000 доллар гардид. Бо ҳамин тартиб, муштзанони тоҷик Чемпионати ҷаҳонро бо як медали нуқра ва як медали биринҷӣ ба анҷом расониданд.
Аз Тоҷикистон дар ин мусобиқаи ҷаҳонӣ аз рӯи ҳама вазнҳо 13 нафар иштирок карданд. Аз байни онҳо ду нафар – Хусравхон Раҳимов ва Акмал Убайдов бо медал бармегарданд. Ғолибони ҷойи якум дар ҳар вазн 300 ҳазор доллар, соҳибони ҷойи дуюм 150 ҳазор доллар, ҷойи сеюм — 75 ҳазор доллар, ҷойи 5-ум 10 ҳазор доллар гирифтанд.
Ёдовар мешавем, ки Чемпионати XXIII ҷаҳон оид ба бокс байни мардон дар соли 2025 аз 2 то 13 декабри соли 2025 дар шаҳри Дубайи Амороти Муттаҳидаи Араб баргузор гардид.
Меҳрони ҚУРБОН,
шореҳи варзиши АМИТ «Ховар»
АКС аз манбаъҳои боз
Дастаи мунтахаби Тоҷикистон оид ба футбол моҳҳои сентябр ва октябр дар сафар се бозии дӯстона баргузор мекунад
35-СОЛАГИИ ИСТИҚЛОЛИ ДАВЛАТӢ. Дар шаҳри Турсунзода зиёда аз 31 иншооти варзишӣ ба истифода дода шуд
ФУТБОЛ. 31 август марҳилаи интихобии Ҷоми Осиё-2027 байни мунтахабҳои ҷавонони то 20-сола оғоз мешавад
Сармураббии нави дастаи мунтахаби наврасони Тоҷикистон (U-17) оид ба футбол таъйин гардид
Дастаи мунтахаби ҷавонони Тоҷикистон (U-20) оид ба футбол бозии дуюми санҷиширо бо дастаи Лубнон мусовӣ анҷом дод
Дастаи мунтахаби ҷавонони Тоҷикистон (U-20) дар бозии якуми санҷишӣ бар дастаи Лубнон пирӯз шуд
Ҳайати васеи дастаи мунтахаби Тоҷикистон оид ба футбол барои бозиҳои дӯстонаи моҳҳои сентябр ва октябр эълон гардид
Ҳайати дастаи мунтахаби ҷавонони Тоҷикистон (U-20) оид ба футбол барои марҳилаи интихобии Ҷоми Осиё-2027 муайян шуд
Дастаи мунтахаби ҷавонони Тоҷикистон (U-20) оид ба футбол бо дастаи Лубнон бозии санҷишӣ баргузор мекунад
Самбочиёни Клуби марказии варзиши артиши Вазорати мудофиаи Тоҷикистон дар Москва соҳиби ду медали биринҷӣ шуданд
«ФУТБОЛ ВА РУШДИ ОН ДАР ҶУМҲУРИИ ТОҶИКИСТОН». Таҳти чунин унвон китоби иттилоотӣ-омӯзишӣ нашр гардид
Мунтахаби Тоҷикистон дар Чемпионати ҷаҳон оид ба гӯштини миллӣ (гӯштингирӣ) 12 медал ба даст овард
