Дар Душанбе намоишгоҳи хайриявӣ баргузор гардид

ДУШАНБЕ, 08.12.2025 /АМИТ «Ховар»/. 6 декабр дар Осорхонаи миллии Тоҷикистон бо ташаббуси Вазорати корҳои хориҷии Ҷумҳурии Тоҷикистон ва бо иштироки роҳбарони намояндагиҳои корпуси дипломатӣ ва созмонҳои байналмилалии муқими Душанбе намоишгоҳи хайриявӣ доир гардид.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, муовини якуми Вазири корҳои хориҷии Ҷумҳурии Тоҷикистон Фаррух Ҳамрализода доир ба мақсаду мароми ин чорабинӣ гуфт, ки Тоҷикистон ҳамеша ҷонибдори ташаббус ва иқдомҳое аст, ки ба нафъи инсон, таҳкими сулҳ, амният ва рушди устувор равона шудаанд. «Мо бар ин боварем, ки амалҳои хайриявӣ ва иқдоми ҳамоҳангу дастҷамъонаи башардӯстона метавонанд ба қишри ниёзманди ҷомеа умеду илҳоми тоза бахшанд», — иброз намуд ӯ.

Таъкид карда шуд, ки намоишгоҳ дар партави ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба роҳ монда шуда, дар таҳкими ҳамкорӣ, густариши робитаҳои инсонӣ ва дастгирии табақаҳои ниёзманди ҷомеа саҳми арзанда мегузорад.

Дар доираи чорабинӣ намояндагиҳои дипломатӣ маҳсулоти қаннодӣ, хӯрокҳои миллӣ, армуғон ва ҳунарҳои мардумии хешро фурӯхта, маблағи бадастомадаро барои дастгирии ниёзмандону маъюбон ба қуттии хайриявӣ гузоштанд.

АКС: Вазорати корҳои хориҷии Ҷумҳурии Тоҷикистон