«Саноатсодиротбонк» барои дастгирии соҳибкорӣ ва иқтисоди «сабз» «Иқдоми нав дар Соли нав»-ро роҳандозӣ менамояд

ДУШАНБЕ, 27.12.2025 /АМИТ «Ховар»/. Корхонаи воҳиди давлатии бонки саноативу содиротии Тоҷикистон «Саноатсодиротбонк» «Иқдоми нав дар Соли нав»-ро роҳандозӣ менамояд.

Тавре ба АМИТ «Ховар» аз «Саноатсодиротбонк» хабар доданд, ҳадафи иқдом дастгирии рушди фаъолияти соҳибкории истеҳсолӣ бо мақсади мусоидат намудан ба ҳадафи чоруми стратегӣ — саноатикунонии босуръати мамлакат ва рушди иқтисоди сабз мебошад.

Дар доираи иқдом барои соҳибкорон ва шаҳрвандон шароити дастрасу имтиёзнок фароҳам оварда шуда, таваҷҷуҳи махсус ба лоиҳаҳои истеҳсолӣ ва ташаббусҳое равона мегардад, ки ба ҳифзи муҳити зист ва истифодаи технологияҳои муосир мусоидат менамоянд.

Иқдом ҳамчунин барои муштариёне, ки аллакай бо Бонк ҳамкорӣ доранд, имконияти иловагӣ фароҳам оварда, барои ҷалби доираи васеи шаҳрвандон ва соҳибкорон равона шудааст.

Шартҳои иқдом:

• меъёри фоизи қарз барои фаъолияти истеҳсолӣ, новобаста аз шакли таъминот 14 фоизи солона;
• меъёри фоизи қарз ба шаҳрвандон ҷиҳати харидории панелҳои офтобӣ 14 фоиз солона муқаррар карда шудааст.

«Саноатсодиротбонк» бо татбиқи чунин ташаббусҳо саҳми худро дар рушди устувори иқтисоди миллӣ ва беҳтар намудани сатҳи зиндагии аҳолӣ идома медиҳад.

АКС: Корхонаи воҳиди давлатии бонки саноативу содиротии Тоҷикистон «Саноатсодиротбонк»