Соҳибкорзанони Тоҷикистон лоиҳаҳои худро дар намоишгоҳи «WomenCup–2025» муаррифӣ намуданд

ДУШАНБЕ, 02.12.2025 /АМИТ «Ховар»/. 1 декабр дар Душанбе бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон дар ҳамкорӣ бо шарикони рушд бахшида ба Рӯзи байналмилалии соҳибкории занон намоиши лоиҳаҳои барномаи инкубатсионии «WomenCup – 2025» доир гардид, ки занони соҳибкори тоҷик тавонистанд лоиҳаҳои худро муаррифӣ намоянд.

Тавре аз ин кумита ба АМИТ «Ховар» хабар доданд, ҳадафи ҳамоиш ба намоиш гузоштани молу маҳсулот ва хизматрасонии занони соҳибкори тоҷик, баланд бардоштани сатҳи огоҳии занону ҷавонони мамлакат оид ба ислоҳоти раванди фаъолияти соҳибкорӣ, муаррифии имконияти молиявӣ, ислоҳоти навин дар ин самт, муаррифии лоиҳаҳо ва нақшаҳои шарикони рушд ба занону духтарони соҳибкор, мубодилаи таҷриба байни занони соҳибкори мамлакат, ҷалби коршиносони сатҳи миллию байналмилалӣ дар самти рушди соҳибкорӣ байни занону ҷавонон, баланд бардоштани малакаи занон дар самти тиҷорати электронӣ, иқтисоди «сабз» ва ҷалби доираи васеи занону духтарони минтақаҳои ҷумҳурӣ мебошад.

Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода иброз дошт, ки дастгирии занон, таҳкими мавқеи онҳо дар ҷомеа, баланд бардоштани саводнокӣ, фароҳамсозии ҷойи нави кор ва рушди соҳибкории занон аз самтҳои афзалиятноки сиёсати иҷтимоии давлат мебошанд.

Таъкид гардид, ки соҳибкорзанони ҷумҳурӣ дар соҳаҳои иқтисодиёти мамлакат, аз ҷумла саноати сабук, кишоварзӣ, хизматрасонӣ, ҳунармандӣ, сайёҳӣ ва ғайра фаъолияти пурсамар доранд. Онҳо на танҳо дар баланд бардоштани сатҳи зиндагии худ, инчунин дар рушди иқтисодиёти мамлакат низ саҳм мегузоранд.

«Дар Тоҷикистон дар доираи сиёсати хирадмандонаи Сарвари давлат лоиҳаҳои занони фаъол тавассути грантҳои президентӣ ва грантҳои шарикони рушд дастгирӣ ёфта, тавонистанд тиҷорати хурду миёна таъсис диҳанд. Инчунин барномаҳои давлатӣ барои баланд бардоштани нақши занон, омӯзиши касбӣ, рушди соҳибкорӣ ва дастрасӣ ба технологияҳои рақамӣ имконияти нав фароҳам оварданд», – изҳор дошт Бунафша Файзиддинзода.

Барномаи «WomenCup-2025» раванд барои рушди иқтидор, ташаккули идеяҳои нав ва ба роҳ мондани шабакаҳои ҳамкорӣ байни занони соҳибкор мебошад.

Зимни ҳамоиш баён гардид, ки лоиҳаҳои пешниҳодшудаи иштирокчиёни WomenCup таҷассуми дониш, малака, ҷаҳонбинии пешрафта ва омодагии занони тоҷик ба рақобат дар бозорҳои муосир мебошанд. Ҳар лоиҳа метавонад дар рушди иқтисодии маҳал ва мамлакат саҳми назаррас гузорад.

Баргузории чунин чорабиниҳо оғози марҳилаи нави рушди соҳибкории занон буда, ба таҳкими нақши онҳо дар иқтисод ва болоравии сатҳи зиндагии оилаҳо мусоидат менамояд.

Моҳинави НАВРӮЗ,
АМИТ «Ховар»

АКС: Кумитаи кор бо занон ва оилаи назди Ҳукумати Ҷумҳурии Тоҷикистон