35-СОЛАГИИ ИСТИҚЛОЛИ ДАВЛАТӢ. Дар шаҳраки Адрасмон корҳои созандагиву ободонӣ вусъат меёбанд

ДУШАНБЕ, 23.01.2026. /АМИТ «Ховар»/. Сокинон, соҳибкорони маҳаллӣ ва масъулини Ҷамоати шаҳраки Адрасмони шаҳри Гулистон ба истиқболи ҷашни 35-солагии Истиқлоли давлатӣ корҳои созандагиву ободониро вусъат бахшидаанд. Аз ҷумла, имрӯзҳо дар ҳудуди ин шаҳрак маъракаи ниҳолшинонӣ, аз ҷумла шинонидани дарахтони сӯзанбарг идома дорад. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Гулистон иттилоъ медиҳад.

Бояд гуфт, ки то инҷониб роҳи асосии Адрасмон – Хуҷанд навсозӣ гардида, роҳҳои дигари маҳаллӣ низ, ки солҳои зиёд рӯйи таъмирро надида буданд, ба маблағи зиёда аз 1 миллион сомонӣ мумфарш шуданд. Роҳи 6-километраи Адрасмон – Хуҷанд ба маблағи 6 миллион сомонии ҷамъкардаи сокинони шаҳрак ҳамвору мумфарш карда шуд.

Ҳамчунин бо кумак ва дастгирии соҳибкорони маҳаллӣ ва волидайни хонандагон Муассисаи таҳсилоти миёнаи умумии №4 бо гармии мутамарказ таъмин гардид. Ҳамзамон бисёр синфхонаҳо, роҳгарду саҳни муассисаҳои таҳсилоти миёнаи умумии рақамҳои 12 ва 7 бо дастгирии соҳибкорони маҳаллӣ бо сифати баланд таъмир карда шуданд. Соҳибкори дигари шаҳраки Адрасмон ба маблағи беш аз ним миллион сомонӣ варзишгоҳи замонавӣ сохта, ба истифода додааст. Ин варзишгоҳи муосир макони дӯстдоштаи насли наврас ва ҷавонон барои тамрин ва баргузор намудани ҳар гуна чорабиниҳои варзишӣ гардидааст.

Сокинони шаҳраки Адрасмон ва соҳибкорони он талош доранд, ки бо анҷоми дигар корҳои созандагиву ободонӣ то фарорасии ин ҷашни фархундаи миллӣ маҳалли хешро боз ҳам ободтару зеботар гардонанд.

Дар Паёми Президенти Ҷумҳурии Тоҷикистон ба Маҷлиси Олӣ 16 декабри соли 2025 Пешвои миллат муҳтарам Эмомалӣ Раҳмон иброз доштанд, ки «соли 2026 барои мо соли таърихӣ – соли ҷашни 35-солагии Истиқлоли давлатӣ аст. Яъне Тоҷикистони куҳанбунёд, аммо тозаистиқлоли мо 35-сола мешавад. Тайи панҷ соли охир тамоми қишрҳои ҷомеа ҷиҳати сазовор истиқбол намудани ин санаи таърихӣ сарҷамъона заҳмат кашида, корҳои бузургро анҷом дода истодаанд».

«То рӯзҳои ҷашни 35-солагии Истиқлоли давлатӣ вақти хеле кам мондааст. Мо бояд то ин санаи муқаддас корҳои созандагиро боз ҳам вусъат бахшида, чорабиниҳои ҷашниро бо сатҳу сифати баланд амалӣ созем. Ҳар як шаҳрванд ва ҳар як оила бояд бо дарки масъулияти ватансозиву давлатсозӣ, пеш аз ҳама, хонаву кошона ва кӯчаву маҳалли зисти худро таъмиру тармим ва тозаву озода намояд. Ин раванди ободонӣ ва тозакорӣ бояд тамоми қаламрави кишварро то дурдасттарин деҳоти он фаро гирад ва ба як кори маъмулӣ табдил ёбад», — хотиррасон намуданд Президенти мамлакат.

АКС: Хадамоти матбуоти Раиси вилояти Суғд