Дар Тоҷикистон аз 16 январ ҳарорати ҳаво паст мешавад

ДУШАНБЕ, 13.01.2026 /АМИТ «Ховар»/. Ба иттилои Агентии обуҳавошиносии Тоҷикистон, аз 16 январ ҳарорати ҳаво дар мамлакат паст мегардад. Бориши борон ва барф пешгӯӣ карда мешавад.

Дар вилояти Хатлон  15 ва 18 январ ҳаво тағйирёбанда шуда, 16 ва 17 январ дар баъзе ноҳияҳо бориши борон ва барф дар назар аст. Шамол аз самти шарқ бо гузариш ба ғарб бо суръати 4-9 ва рӯзҳои 15 ва 17 январ дар баъзе ноҳияҳо то 10-15 метр дар як сония мевазад. Ҳаво дар водиҳо шабона 0+5 ва рӯзона 14+19 дараҷа гарм мешавад. Аз 16 то 18 январ ҳарорати ҳаво паст шуда, то 1+6 ва дар ноҳияҳои доманакӯҳӣ шабона 0+5 дараҷа гарм, рӯзона 8+13 дараҷа гармӣ дар назар аст.

Дар вилояти Суғд 16-17 январ дар ноҳияҳои алоҳида бориши борон ва барф пешгӯӣ мешавад.  Дар баъзе ноҳияҳо туман мефарояд. Ҳаво дар водиҳо шабона аз 0+5 дараҷа гарм то 0-5 дараҷа хунук, рӯзона 5+10 дараҷа гарм мешавад. Рӯзҳои 16-18 январ ҳарорати ҳаво паст шуда, аз 1 дараҷа хунук то 4 дараҷа гарм ва  дар ноҳияҳои кӯҳӣ шабона 5-10 дараҷа хунук, рӯзона аз 2 дараҷа хунук то 3 дараҷа гарм мешавад.

Дар ноҳияҳои тобеи ҷумҳурӣ ҳавои тағйирёбанда шуда, 16-17 январ бориши борон ва барф дар назар аст. Шамол аз самти шарқ бо гузариш ба ғарб бо суръати 4-9, рӯзҳои 15-17 январ дар ноҳияҳои алоҳида то 10-15 метр дар як сония мевазад. Ҳаво дар водиҳо шабона 1+6 дараҷа гарм шуда, 16-18 январ аз 3 дараҷа хунук то 2 дараҷа гарм мешавад. Аз 16 то 18 январ рӯзона ҳаво 3+8 дараҷа гарм, дар ноҳияҳои кӯҳӣ шабона 1-6 дараҷа хунук ва рӯзона 1+6 дараҷа гарм мешавад.

15 январ дар Вилояти Мухтори Кӯҳистони Бадахшон ҳавои тағйирёбандаи бебориш пешгӯӣ шуда, 16-18 январ дар баъзе ноҳияҳо бориши борон ва барф дар назар аст. Ҳаво дар ғарби вилоят шабона 5-10 дараҷа хунук, рӯзона 3+8 дараҷа гарм, дар шарқи вилоят шабона 21-26 дараҷа хунук, рӯзона 5-10 дараҷа хунук мешавад.