Дар Душанбе масъалаи идоракунии обҳои зеризаминӣ дар Осиёи Марказӣ баррасӣ гардид

ДУШАНБЕ, 26.01.2027 /АМИТ «Ховар»/. Дар Институти масъалаҳои об, гидроэнергетика ва экологияи Академияи миллии илмҳои Тоҷикистон вохӯрии роҳбарияти институт бо намояндагони созмонҳои байналмилалӣ — Cowater International, Survey Geological of Finland (GTK), HELVETAS ва Alterra баргузор гардид.

Тавре АМИТ «Ховар» бо истинод ба Академияи миллии илмҳо хабар медиҳад, дар вохӯрӣ Ташаббуси минтақавии идоракунии обҳои зеризаминӣ дар Осиёи Марказӣ (RGWMI), ки аз ҷониби Ҳукумати Швейтсария тавассути Агентии Швейтсария оид ба рушд ва ҳамкорӣ (SDC) дар Осиёи Марказӣ амалӣ мегардад, баррасӣ карда шуд.

Ин ташаббус ба идоракунии устувори захираҳои обҳои зеризаминӣ, рушди ҳамкории минтақавӣ ва таҳкими иқтидори илмию техникӣ равона карда шудааст.

Ҷонибҳо нақши муҳими муассисаҳои илмиро дар гузаронидани таҳқиқот, табодули дониш ва ташаккули заминаи далелҳо таъкид намуда, барои ҳамкории минбаъда изҳори ҳавасмандӣ намуданд.

АКС: Академияи миллии илмҳои Тоҷикистон