Ҷаласаи миллӣ оид ба таҳияи дастурамалҳои рушди устувори гидроэнергетикаи хурд баргузор шуд

ДУШАНБЕ, 17.02.2026 /АМИТ  «Ховар»/. Дар шаҳри Душанбе бо ташаббуси Вазорати энергетика ва захираҳои оби Ҷумҳурии Тоҷикистон дар ҳамоҳангӣ бо Комиссияи иқтисодии Созмони Милали Муттаҳид барои Аврупо ҷаласаи машваратии миллӣ оид ба таҳияи дастурамалҳои рушди устувори гидроэнергетикаи хурд ва дастурҳои методологии чаҳорчӯбавӣ оид ба арзёбии таъсири экологӣ барои неругоҳҳои барқи обии хурд баргузор гардид. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад.

Иброз гардид, ки Ҳукумати Тоҷикистон барои пешбурди соҳаи гидроэнергетика якчанд ҳуҷҷати стратегӣ,  аз ҷумла барномаҳои сохтмони неругоҳҳои хурди барқӣ, рушди манбаъҳои барқароршавандаи энергия барои давраҳои гуногун ва «Барномаи рушди соҳаи энергетикаи барқӣ барои солҳои 2026-2030»-ро қабул намудааст. Дар доираи ин ташаббусҳо дар Тоҷикистон зиёда аз 300 неругоҳи хурди барқӣ ба истифода дода шуд.

Дар ҷаласа муовини Вазири энергетика ва захираҳои оби ҷумҳурӣ Шариф Маҳмадзода иброз намуд, ки рушди манбаъҳои барқароршавандаи энергия барои Ҷумҳурии Тоҷикистон аҳамияти хосса дошта, омили муҳими таъмини рушди устувор, амнияти энергетикӣ ва коҳиши хатари тағйирёбии иқлим мебошад. Дар шароити релефи кӯҳистон ва мавҷудияти шумораи зиёди дарёҳо бунёди неругоҳҳои барқи обии хурд барои таъмини барқи минтақаҳои дурдаст ва душворгузар хеле муҳим мебошад.

Такъид гардид, ки бо вуҷуди дастовардҳо ҳамоно мушкилиҳо низ  ҷой доранд. Қисми зиёди неругоҳҳои амалкунанда солҳои пеш бунёд шуда, ба таҷдиду навсозӣ ва муҷаҳҳазгардонӣ бо таҷҳизоти муосир ниёз доранд.

Зимни ҷаласа сохтор, ҳадаф ва мақсадҳои дастурамалҳои рушди устувори гидроэнергетикаи хурд ва дастурҳои методологии чаҳорчӯбавӣ оид ба арзёбии таъсири экологӣ барои неругоҳҳои барқи обии хурд баррасӣ гардиданд.

АКС: Вазорати энергетика ва захираҳои оби Ҷумҳурии Тоҷикистон