РУШДИ САНОАТИ ФАРМАТСЕВТИИ ВАТАНӢ. Дар Парки технологии Донишгоҳи миллии Тоҷикистон аз пӯсти меваи анор дору тайёр мекунанд

ДУШАНБЕ, 11.02.2026 /АМИТ «Ховар»/. Дар доираи корҳои илмӣ-таҳқиқотӣ унвонҷӯи кафедраи технологияи фарматсевтӣ ва фармакологияи Донишгоҳи миллии Тоҷикистон Бахтиёр Арзиматов ҳамроҳ бо донишҷӯи курси чоруми факултети фарматсевтӣ Муниса Анварова ва мудири Пойгоҳи дорусозии Парки технологии Донишгоҳи миллии Тоҷикистон Пайрав Халифаев омӯзиши ҳамаҷонибаи пӯстлохи меваи анорро ҳамчун манбаи дастрас ва дурнамодори маводи доруӣ анҷом доданд. Дар ин хусус ба АМИТ «Ховар» аз Донишгоҳи миллии Тоҷикистон хабар доданд.

Ба иттилои манбаъ, натиҷаи таҳқиқот ба таҳия ва истеҳсоли шакли ниҳоии доруворӣ — таблеткаҳо барои истифода дар ҳолатҳои камхунӣ равона гардида, марҳилаи озмоишҳои лабораторӣ натиҷаҳои мусбат нишон додааст.

Лоиҳаи мазкур дар Озмуни умумидонишгоҳии «Ихтироъкорони ояндасоз» дар байни зиёда аз 30 лоиҳаи илмӣ-инноватсионӣ сазовори ҷойи якум гардид. Ин аз аҳамияти баланди илмӣ-амалӣ ва сатҳи навоваронаи ин таҳқиқот шаҳодат медиҳад.

Аҳамияти ихтироъ:

— истифодаи ашёи хоми маҳаллӣ ва арзон (пӯстлохи анор), коҳиши вобастагӣ аз доруҳои воридотӣ;

-дорои моддаҳои биологӣ-фаъол, антиоксидантҳо ва микроэлементҳо будани он аст, ки ба беҳтаршавии хунсозӣ мусоидат менамоянд;

— паст шудани арзиши дору ва дастрас гардидани он барои аҳолӣ;

— коркарди партовҳои кишоварзӣ ва мусоидат ба иқтисоди «сабз»;

— рушди дорусозии миллӣ ва татбиқи илм дар истеҳсолот.

Ин иқдом намунаи равшани пайвастани илм, истеҳсолот ва инноватсия буда, ба таҳкими амнияти дорувории мамлакат ва рушди саноати фарматсевтии ватанӣ мусоидат менамояд.

АКС: Донишгоҳи миллии Тоҷикистон