Дар Машҳад имкониятҳои сайёҳии Тоҷикистон муаррифӣ шуданд

ДУШАНБЕ, 28.02.2026 /АМИТ «Ховар»/. Дар шаҳри Машҳад чорабинии муштараки Сафорати Тоҷикистон дар Эрон ва ширкати сайёҳии «Ҳумо сафар» бахшида ба имкониятҳои сайёҳии Тоҷикистон баргузор шуд.

Тавре ба АМИТ «Ховар» аз Сафорати Тоҷикистон дар Эрон хабар доданд, дар он масъулини устони Хуросони Разавӣ, раисони идораҳои мероси фарҳангӣ, гардишгарӣ ва ҳунарҳои дастии устонҳои Хуросони Разавӣ ва Хуросони Шимолӣ, раиси Анҷумани ширкатҳои сайёҳии Эрон ва мудирони ширкатҳои сайёҳӣ иштирок намуданд.

Дар чорабинӣ  намояндагони Сафорати Тоҷикистон вобаста ба иқдомҳои Ҳукумати Ҷумҳурии Тоҷикистон дар самти рушди соҳаи сайёҳӣ ва имконоту тавонмандиҳои сайёҳӣ дар ҷумҳурӣ маълумот дода, ба зарурати густариши бештари ҳамкорӣ ва табодули таҷриба байни  мутахассисони ду мамлакат, инчунин ташкили хатсайрҳои сайёҳии муштарак таъкид карданд.

Дар доираи чорабинӣ наворҳои инъикоскунандаи зебоиҳову ҷозибаҳои сайёҳӣ ва таҷлили Наврӯз дар Тоҷикистон ба намоиш гузошта шуданд. Сипас маводҳо доир ба рушди сайёҳӣ дар Тоҷикистон ба иштироккунандагони чорабинӣ  тақдим гардид.

АКС: Сафорати Тоҷикистон дар Эрон