ФУТБОЛ. Дастаи мунтахаби наврасони Тоҷикистон дар мусобиқаи байналмилалӣ дар Хиросима иштирок мекунад

ДУШАНБЕ, 17.02.2026 /АМИТ «Ховар»/. Дар доираи омодагиҳо ба қисми ниҳоии Ҷоми Осиё-2026 дастаи наврасони то 17-солаи Тоҷикистон оид ба футбол таҳти роҳбарии Далер Каёсов барои иштирок дар мусобиқаи байналмилалӣ ба шаҳри Хиросимаи Ҷопон сафар кард.

Тавре ба АМИТ «Ховар» аз Федератсияи футболи Тоҷикистон хабар доданд, мусобиқаи «Prayer for Peace; Hiroshima International Youth Soccer Games» аз 18 то 24 феврал баргузор мешавад. Тибқи муқаррарот, иштирокчиён бо ҳамдигар дар як давр бозӣ мекунанд. Дар мусобиқа инчунин дастаҳои мунтахаби наврасони то 17-солаи Ҷопон, дастаи музофоти Хиросима (U-18) ва тими Академияи «Санфречче Хиросима» (U-18) иштирок мекунанд.

Барои дастаи наврасони то 17-солаи Тоҷикистон иштирок дар ин мусобиқа марҳилаи омодагӣ ба қисми ниҳоии Ҷоми Осиё-2026 мебошад, ки дар Арабистони Саудӣ доир мегардад. Дар марҳилаи гурӯҳӣ наврасони мо дар гурӯҳи «А» бо дастаҳои  мунтахаби Тайиланд (5 май), Мянмар (9 май) ва Арабистони Саудӣ (12 май) рақобат хоҳанд кард.

АКС: Федератсияи футболи Тоҷикистон