НИШАСТИ МАТБУОТӢ. Соли 2025 дар Тоҷикистон беш аз 11 ҳазор иншооти варзишӣ фаъолияти пурсамар намуданд

ДУШАНБЕ, 05.02.2026 /АМИТ «Ховар»/. То 1 декабри соли 2025 дар шаҳру ноҳияҳои ҷумҳурӣ мувофиқи маълумоти оморӣ 11 ҳазору 280 иншооти варзишӣ, новобаста аз шакли моликияташон ба қайд гирифта шудаанд. Дар ин хусус имрӯз зимни нишасти матбуотӣ Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода ба хабарнигорон маълумот дод.

Иттилоъ дода шуд, ки инҳо 129 варзишгоҳ, 7966 майдончаи варзишӣ, 2321 толори варзишӣ, 107 ҳавзи шиноварӣ, 91 маҷмааи варзишӣ ва марказҳои солимгардонӣ, 771 иншооти махсуси варзишӣ, аз қабили тир, боулинг, фитнес, билярд, майдони яхмолакбозӣ, тенниси рӯи миз ва клубҳои ихтиёрӣ мебошанд, ки фаъолияти пурсамар доранд.

«Давоми соли 2025 дар шаҳру ноҳияҳои ҷумҳурӣ 174 иншооти варзишӣ, аз ҷумла 132 майдончаи варзишӣ, 35 толори варзишӣ, 3 ҳавзи шиноварӣ, 2 маҷмааи варзишӣ ва марказҳои солимгардонӣ сохта шуданд»,-баён дошт Зулфиқор Гулаҳмадзода.

Иброз гардид, ки ин иншоот бо харҷи 174 миллиону 254 ҳазор сомонӣ сохта шудаанд. 96 миллиону 630 ҳазор сомонии он аз ҳисоби буҷети давлатӣ ва 76 миллиону 808 ҳазор сомонӣ аз ҳисоби соҳибкорону сарпарастон мебошад.

Зарангези ЛАТИФ,
АМИТ «Ховар»

АКС: АМИТ «Ховар»