Ҷаласаи сеюми Гурӯҳи кории муштараки Тоҷикистону Покистон оид ба савдо, сармоягузорӣ ва нақлиёт баргузор шуд

ДУШАНБЕ, 18.03.2026 /АМИТ «Ховар»/. 17 март ҷаласаи сеюми Гурӯҳи кории муштараки Тоҷикистону Покистон оид ба савдо, сармоягузорӣ ва нақлиёт дар шакли маҷозӣ баргузор гардид. Дар ин хусус ба АМИТ «Ховар» аз Вазорати рушди иқтисод ва савдои Ҷумҳурии Тоҷикистон хабар доданд.

Иттилоъ дода шуд, ки дар ҷаласа намояндагони вазорату идораҳои дахлдори ҳарду давлат иштирок намуда, масъалаҳои муҳими иқтисодиро мавриди баррасӣ қарор доданд.

Инчунин ҷонибҳо масъалаи стратегии татбиқ ва фаъолсозии долони нақлиёти автомобилӣ, афзоиши гардиши савдои дуҷониба ва дар ин замина таҳия ва тасдиқ намудани харитаи роҳ, таъсиси корхонаҳои нассоҷӣ ва фарматсевтикиро муҳокима намуданд.

Дар анҷоми вохӯрӣ ҷонибҳо изҳор доштанд, ки татбиқи амалии тавофуқоти бадастомада метавонад ба рушди минбаъдаи ҳамкории иқтисодию тиҷоратии Тоҷикистону Покистон такони ҷиддӣ бахшад.

АКС: Вазорати рушди иқтисод ва савдои Ҷумҳурии Тоҷикистон