ДАРАХТ БИНШОН! Дар хатсайрҳои сайёҳии Панҷакент беш аз 200 бех ниҳол шинонида шуд

ДУШАНБЕ, 16.03.2026 /АМИТ «Ховар»/. Дар доираи татбиқи «Барномаи давлатии кабудизоркунии Ҷумҳурии Тоҷикистон то соли 2040» ва сабзкории хатсайрҳои сайёҳӣ дар шафати шоҳроҳи Панҷакент-Айнӣ дар ҳудуди шаҳр, ҷамоатҳои деҳот, роҳи ёдгории Панҷакенти қадим бо иштироки даҳҳо нафар кормандони ташкилоту муассисаҳо ҳазорҳо бех ниҳолҳои ороишӣ шинонида шуданд. Дар ин хусус АМИТ «Ховар» бо  истинод ба Мақомоти иҷроияи ҳокимияти давлатии шаҳри Панҷакент иттилоъ медиҳад.

Ин иқдомро ширкатҳои сайёҳии «Панҷакент-интур» ва «Зарафшон маҷести травел»  дастгирӣ намуданд. Ҳамзамон дар шафати қитъаи роҳи маҳаллии Зимтӯд – Ғазза ва ҳудуди пойгоҳи сайёҳии Симиганҷ беш аз 200 бех ниҳоли дарахти ҳамешасабзи ороишии сӯзанбарги мутобиқ ба иқлими кӯҳӣ шинонида шуд.

Маъракаи ниҳолшинонию сабзгардонӣ идома дошта, ширкатҳои сайёҳии шаҳри Панҷакент  низ дар ободонию хуррамгардонии диёр саҳм мегузоранд.

Бояд гуфт, ки «Барномаи давлатии кабудизоркунии Ҷумҳурии Тоҷикистон барои давраи то соли 2040» бо ташаббуси Президенти Ҷумҳурии Тоҷикистон муҳтарам Эмомалӣ Раҳмон барои ба «кишвари сабз» табдил додани Тоҷикистон қабул гардида, тибқи Нақшаи амал дар қаламрави мамлакат то соли 2040 бояд зиёда аз 2 миллиард бех ниҳол шинонида шавад. Ниҳолҳо на танҳо дар ҳудуди ҷангалзор, балки дар шаҳрҳо, канори роҳҳо, атрофи заминҳои кишоварзӣ ва минтақаҳои кӯҳӣ низ шинонида мешаванд. Ба дарахтони мевадиҳанда, сояафкан ва ороишӣ, ки ба иқлими хушки минтақа тобовар мебошанд, афзалият дода мешавад.

Мақсади асосии таҳияи «Барномаи давлатии кабудизоркунии Ҷумҳурии Тоҷикистон барои давраи то соли 2040» мубориза бо чангу ғубор, муътадилсозии иқлим, беҳтар сохтани вазъи муҳити зист ва коҳиши обшавии пиряхҳо мебошад.

АКС: Мақомоти иҷроияи ҳокимияти давлатии шаҳри Панҷакент