ДАРАХТ БИНШОН! Дар минтақаи Рашт беш аз 5 000 ниҳоли дарахтони ҳамешасабз ва ороишӣ шинонида шуд

ДУШАНБЕ, 14.03.2026. /АМИТ «Ховар»/. Дар ноҳияҳои минтақаи Рашт беш аз 5 000 ниҳоли дарахтони ҳамешасабз ва ороишӣ шинонида шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар ин минтақа маъракаи ниҳолшинонӣ баргузор шуд¸ ки дар он муовини Сарвазири Ҷумҳурии Тоҷикистон Сулаймон Зиёзода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода, роҳбарият ва масъулину сокинони ноҳияҳои Рашт, Нуробод, Тоҷикобод ва Лахш иштирок намуданд.

Зимни суҳбат бо мақсади нашъунамои хуби ниҳолҳои шинонидашуда ба масъулини соҳа тавсияҳо дода шуд.

Айни замон бо истифода аз ҳавои мусоид дар тамоми шаҳру ноҳияҳои ҷумҳурӣ иқдомҳои амалии ниҳолшинонву кабудизоркунӣ дар доираи нақшаи амали «Барномаи давлатии кабудизоркунӣ дар Ҷумҳури Тоҷикистон барои давраи то соли 2040» бомаром идома дорад.

Ҳамзамон, корҳои ободониву созандагӣ, тозагиву озодагӣ дар доираи омодагиҳо ба таҷлили сазовори ҷашни байнналмилаии Наврӯз вусъати тоза меёбанд.

Ёдовар мешавем, ки «Барномаи давлатии кабудизоркунии Ҷумҳурии Тоҷикистон барои давраи то соли 2040» бо ташаббуси Президенти мамлакат муҳтарам Эмомалӣ Раҳмон барои ба «кишвари сабз» табдил додани Тоҷикистон қабул гардид.

Тибқи нақшаи амали ин барнома, дар қаламрави мамлакат то соли 2040 бояд зиёда аз 2 миллиард бех ниҳол шинонида шавад. Ниҳолҳо на танҳо дар ҳудуди ҷангалзор, балки дар шаҳрҳо, канори роҳҳо, атрофи заминҳои кишоварзӣ ва минтақаҳои кӯҳӣ низ шинонида мешаванд. Ба дарахтони мевадиҳанда, сояафкан ва ороишӣ, ки ба иқлими хушки минтақа тобовар мебошанд, афзалият дода мешавад.

Мақсади асосии таҳияи «Барномаи давлатии кабудизоркунии Ҷумҳурии Тоҷикистон барои давраи то соли 2040» мубориза бо чангу ғубор, муътадилсозии иқлим, беҳтар сохтани вазъи муҳити зист ва коҳиши обшавии пиряхҳо мебошад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон