Маорифчиёни ноҳияи Шоҳмансур Ҷашни байналмилалии Наврӯзро дар сатҳи баланд таҷлил намуданд

ДУШАНБЕ, 27.03.2026 /АМИТ «Ховар»/. Ба муносибати Ҷашни байналмилалии Наврӯз чорабинии фарҳангӣ – фароғатии маорифчиёни ноҳияи Шоҳмансур баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Шоҳмансур хабар доданд.

Чорабинӣ бо боздид аз намоиши ҳунарҳои мардумӣ оғоз ёфта, ҳар як муассисаи таълимии ноҳия дастархони идонаи худро бо рамзҳои наврӯзии «ҳафтсин» ва «ҳафтшин» оро ва намунаҳои гуногуни ҳунарҳои дастию хӯрокҳои миллиро намоиш дод.

Муовини Раиси ноҳияи Шоҳмансур Заррина Зуҳурзода иброз намуд, ки Наврӯз дар баробари ҷашни эҳёи табиат, мактаби бузурги ахлоқиву маънавӣ ба шумор рафта, инсонҳоро ба сулҳу дӯстӣ, ваҳдату ҳамдигарфаҳмӣ, покизагӣ ва накукорӣ ҳидоят менамояд.

Дар ин замина, аз суханони Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ёдовар шуда, нақши Наврӯз дар таҳкими арзишҳои миллӣ ва худшиносии ҷомеа муҳим арзёбӣ гардид.

Дар идомаи чорабинӣ як зумра омӯзгорони фаъоли ноҳия бо унвонҳои соҳавию ифтихорнома сарфароз гардонида шуда, ғолибони озмуни ноҳиявии «Кадбонуи беҳтарин» бо диплом қадрдонӣ карда шуданд.

АКС: Мақомоти иҷроияи ҳокимияти давлатии ноҳияи Шоҳмансур